diwar ke hue to kabhi dar ke ho gae

dīvār ke hue to kabhī dar ke ho ga.e

mere charāġh bād-e-sitamgar ke ho ga.e

maiñ is tarah se kūcha-e-vahshat kī ho ga.ī

mallāh jis tarah se samundar ke ho ga.e

us ke dil-o-nigāh kā kis se kareñ gila

us ke dil-o-nigāh to patthar ke ho ga.e

jo mujh ko chāhte the kabhī sar se paañv tak

dushman na jaane kyuuñ vo mire sar ke ho ga.e

jo tere pairahan kī mahak le ke aa.ī thī

ham to usī havā-e-mo.attar ke ho ga.e

maiñ terī ḳhushbūoñ kī talabgār jab huī

tere chaman ke phuul bhī patthar ke ho ga.e

ye kaisī gardisheñ haiñ ki arz-o-samā pe aaj

shams-o-qamar charāġh barābar ke ho ga.e

ḳheme jale charāġh bujhe aur is ke ba.ad

nezoñ pe sar-buland bahattar ke ho ga.e

bārish ko bādaloñ ko samundar ko chhoḌ kar

'afroz' ham to sāqī-e-kausar ke ho ga.e

diwar ke hue to kabhi dar ke ho gae

mere charagh baad-e-sitamgar ke ho gae

main is tarah se kucha-e-wahshat ki ho gai

mallah jis tarah se samundar ke ho gae

us ke dil-o-nigah ka kis se karen gila

us ke dil-o-nigah to patthar ke ho gae

jo mujh ko chahte the kabhi sar se panw tak

dushman na jaane kyun wo mere sar ke ho gae

jo tere pairahan ki mahak le ke aai thi

hum to usi hawa-e-moattar ke ho gae

main teri KHushbuon ki talabgar jab hui

tere chaman ke phul bhi patthar ke ho gae

ye kaisi gardishen hain ki arz-o-sama pe aaj

shams-o-qamar charagh barabar ke ho gae

KHeme jale charagh bujhe aur is ke baad

nezon pe sar-buland bahattar ke ho gae

barish ko baadalon ko samundar ko chhoD kar

'afroz' hum to saqi-e-kausar ke ho gae