diwar-o-dar ke aib ka meamar kya karen

dīvār-o-dar ke aib kā me.amār kyā kareñ

patthar alag alag haiñ to āsār kyā kareñ

kab se bhaTak rahe haiñ talabgār kyā kareñ

haa.il hue haiñ raah meñ kohsār kyā kareñ

afsos chhin gayā hai rivāyāt kā libās

uryāñ hue haiñ aaj ke ash.ār kyā kareñ

ab ḳhatt-e-mustaqīm haiñ rishtoñ ke dā.ere

markaz hī jab nahīñ hai to parkār kyā kareñ

baazū hī kaT ga.e haiñ to laḌne se fā.eda

ab ham kisī se maañg ke talvār kyā kareñ

sho.ale nahīñ ki jin ko bujhāyā na jā sake

jalne lageñ hurūf to fankār kyā kareñ

'shāhid' tamām shahr añdheroñ meñ kho gayā

ab imtiyāz-e-kūcha-o-bāzār kyā kareñ

diwar-o-dar ke aib ka meamar kya karen

patthar alag alag hain to aasar kya karen

kab se bhaTak rahe hain talabgar kya karen

hail hue hain rah mein kohsar kya karen

afsos chhin gaya hai riwayat ka libas

uryan hue hain aaj ke ashaar kya karen

ab KHatt-e-mustaqim hain rishton ke daere

markaz hi jab nahin hai to parkar kya karen

bazu hi kaT gae hain to laDne se faeda

ab hum kisi se mang ke talwar kya karen

shoale nahin ki jin ko bujhaya na ja sake

jalne lagen huruf to fankar kya karen

'shahid' tamam shahr andheron mein kho gaya

ab imtiyaz-e-kucha-o-bazar kya karen