diwar-o-dar se chahe to rishta bana ke rakh

dīvār-o-dar se chāhe to rishta banā ke rakh

lekin burā na maane to dastak bachā ke rakh

tū āñdhiyoñ ke khel se vāqif nahīñ abhī

palkoñ ke taaq par na tū dīpak jalā ke rakh

ḳhāliq jo tū ne is ko banāyā hai gul-badan

phir hāsidoñ ke shar se bhī is ko bachā ke rakh

sun ai amīr-e-shahr maiñ momin mizāj huuñ

apnī munāfiqat se na mujh ko dabā ke rakh

dushman bhī ho to us ke halaq se utar sake

lahje ke jaam ko zarā mīThā banā ke rakh

phir se chanāb-e-hijr hai be-tāb kūza-gar

mere liye ghaḌā koī kachchā banā ke rakh

diwar-o-dar se chahe to rishta bana ke rakh

lekin bura na mane to dastak bacha ke rakh

tu aandhiyon ke khel se waqif nahin abhi

palkon ke taq par na tu dipak jala ke rakh

KHaliq jo tu ne is ko banaya hai gul-badan

phir hasidon ke shar se bhi is ko bacha ke rakh

sun ai amir-e-shahr main momin mizaj hun

apni munafiqat se na mujh ko daba ke rakh

dushman bhi ho to us ke halaq se utar sake

lahje ke jam ko zara miTha bana ke rakh

phir se chanab-e-hijr hai be-tab kuza-gar

mere liye ghaDa koi kachcha bana ke rakh