diwar ro rahi hai koi dar bhi KHush nahin

dīvār ro rahī hai koī dar bhī ḳhush nahīñ

kurlā rahī hai kuuñj kabūtar bhī ḳhush nahīñ

maidāñ meñ chhoḌ aa.e haiñ neze bhī Dhaal bhī

ye jang jiit kar mirā lashkar bhī ḳhush nahīñ

sahrā se merī vaise hī bantī na thī kabhī

dariyā ḳhafā hai mujh se samundar bhī ḳhush nahīñ

is āshiqī meñ sab ko barābar sila milā

aajiz hue haiñ ḳhvār to ḳhud-sar bhī ḳhush nahīñ

ai husn-e-bā-kamāl tire lams ke baġhair

kamra to aur chiiz hai bistar bhī ḳhush nahīñ

is khurdure libās se koī gila hī kyā

mujh se to merā reshmī paikar bhī ḳhush nahīñ

andar ke habs se haiñ tujhe mas.ale magar

tū hujra-e-vajūd ke bāhar bhī ḳhush nahīñ

duniyā meñ aa ke maiñ hī akelā nahīñ udaas

duniyā kī sair kar ke sikandar bhī ḳhush nahīñ

maiñ raqs kar rahā huuñ havā ho nahīñ rahā

nārāz haiñ malang qalandar bhī ḳhush nahīñ

aisī udāsiyoñ kā baserā hai in dinoñ

mujh sā faqīr aap se mil kar bhī ḳhush nahīñ

diwar ro rahi hai koi dar bhi KHush nahin

kurla rahi hai kunj kabutar bhi KHush nahin

maidan mein chhoD aae hain neze bhi Dhaal bhi

ye jang jit kar mera lashkar bhi KHush nahin

sahra se meri waise hi banti na thi kabhi

dariya KHafa hai mujh se samundar bhi KHush nahin

is aashiqi mein sab ko barabar sila mila

aajiz hue hain KHwar to KHud-sar bhi KHush nahin

ai husn-e-ba-kamal tere lams ke baghair

kamra to aur chiz hai bistar bhi KHush nahin

is khurdure libas se koi gila hi kya

mujh se to mera reshmi paikar bhi KHush nahin

andar ke habs se hain tujhe masale magar

tu hujra-e-wajud ke bahar bhi KHush nahin

duniya mein aa ke main hi akela nahin udas

duniya ki sair kar ke sikandar bhi KHush nahin

main raqs kar raha hun hawa ho nahin raha

naraaz hain malang qalandar bhi KHush nahin

aisi udasiyon ka basera hai in dinon

mujh sa faqir aap se mil kar bhi KHush nahin