dikha do gar mang apni shab ko to hashr barpa ho kahkashan par

dikhā do gar maañg apnī shab ko to hashr barpā ho kahkashāñ par

chuno jabīñ par kabhī jo afshāñ to nikleñ taare na āsmāñ par

nahīñ haiñ shabnam ke sub.h qatre ye barg-e-gul-hā-e-bostāñ par

ba-yād-e-ātish-ruḳhāñ phaphūle paḌe haiñ har phuul kī zabāñ par

kahāñ sar-e-sham.a par hai sho.ala nigāh Tuk kiije sham.a-dāñ par

ki ustuḳhāñ hai ġhizā hamārī humā ye baiThā hai ustuḳhāñ par

asīr-e-nau kī ḳhabar le aa kar zarā tū sayyād-e-zulm-pesha

yahāñ talak huuñ qafas meñ taḌpā ki mere saare haiñ dhajjiyāñ par

hamāre is rū-e-zard par jo sarishk-e-afshāñ hai abr-e-mizhgāñ

na dekhī laalī kabhī barastī kisī ne yuuñ kisht-e-za.afarāñ par

koī ġharīboñ ke mārne se havā bañdhī hai kisī kī zālim

agar sulaimān-e-vaqt hai to qadam na rakh mor-e-nā-tavāñ par

banā ke ā.īna saaf us ko kiyā hai husn-e-adā se vāqif

ilāhī ā.īna-sāz kī ab shitāb patthar paḌe zabāñ par

jahāñ meñ us ke shahīd kā ho na kyūñki rutba buland yaaro

yahī hai me.arāj āshiqoñ kī jo sar ho ba.ad-az-fanā sināñ par

kare chaman meñ na kyūñki barpā tirā ye buuTā sā qad qayāmat

nisār āñkhoñ pe kyā hai nargis ki ġhuncha qurbān hai dahāñ par

rahī hai bazm-e-jahāñ meñ mun.im sadā bulandī ke saath pastī

bisān-e-favvāra qasd mat kar zamīñ se jaane kā āsmāñ par

safar adam kā kahāñ kare hai ye bahr-e-hastī se ek dam meñ

hubāb chashmak-zanī kare hai ḳhizar tirī umr-e-jāvedāñ par

umiid kyā charḳh-e-sifla-parvar hameñ ho ab tujh se ek naañ kī

ki tere hāthoñ se māh-e-nau ne yahāñ qanā.at kī niim naañ par

'nasīr' kahte to sab yahāñ haiñ ki us ke āshiq haiñ ham va-lekin

baḌā sitam ho baḌā ġhazab ho agar vo aa jaa.e imtihāñ par

dikha do gar mang apni shab ko to hashr barpa ho kahkashan par

chuno jabin par kabhi jo afshan to niklen tare na aasman par

nahin hain shabnam ke subh qatre ye barg-e-gul-ha-e-bostan par

ba-yaad-e-atish-ruKHan phaphule paDe hain har phul ki zaban par

kahan sar-e-shama par hai shoala nigah Tuk kije shama-dan par

ki ustuKHan hai ghiza hamari huma ye baiTha hai ustuKHan par

asir-e-nau ki KHabar le aa kar zara tu sayyaad-e-zulm-pesha

yahan talak hun qafas mein taDpa ki mere sare hain dhajjiyan par

hamare is ru-e-zard par jo sarishk-e-afshan hai abr-e-mizhgan

na dekhi lali kabhi barasti kisi ne yun kisht-e-zafaran par

koi gharibon ke marne se hawa bandhi hai kisi ki zalim

agar sulaiman-e-waqt hai to qadam na rakh mor-e-na-tawan par

bana ke aaina saf us ko kiya hai husn-e-ada se waqif

ilahi aaina-saz ki ab shitab patthar paDe zaban par

jahan mein us ke shahid ka ho na kyunki rutba buland yaro

yahi hai mearaj aashiqon ki jo sar ho baad-az-fana sinan par

kare chaman mein na kyunki barpa tera ye buTa sa qad qayamat

nisar aankhon pe kya hai nargis ki ghuncha qurban hai dahan par

rahi hai bazm-e-jahan mein munim sada bulandi ke sath pasti

bisan-e-fawwara qasd mat kar zamin se jaane ka aasman par

safar adam ka kahan kare hai ye bahr-e-hasti se ek dam mein

hubab chashmak-zani kare hai KHizar teri umr-e-jawedan par

umid kya charKH-e-sifla-parwar hamein ho ab tujh se ek nan ki

ki tere hathon se mah-e-nau ne yahan qanaat ki nim nan par

'nasir' kahte to sab yahan hain ki us ke aashiq hain hum wa-lekin

baDa sitam ho baDa ghazab ho agar wo aa jae imtihan par