dikhati hai meri tahrir eajaz-e-raqam mera

dikhātī hai mirī tahrīr e.ajāz-e-raqam merā

zabān-e-be-zabāñ ban ban ke chaltā hai qalam merā

huā hai vaj.h-e-barbādī vajūd-e-kal-adam merā

milātā hai mujhe miTTī meñ har naqsh-e-qadam merā

subuk hūñgā na qātil kī subukdastī ke ehsāñ se

rahegā roz-e-mahshar bhī sar-e-taslīm ḳham merā

gul-e-dāġh-e-jigar kī qadr jannat meñ huī jā kar

bahut mushtāq niklā bāġh-e-firdaus-o-iram merā

na hone paa.ī laġhzish imtihāñ-gāh-e-mohabbat meñ

ḳhudā kā shukr hai sābit qadam niklā qadam merā

na jiine kī ḳhushī mujh ko na kuchh marne kā andesha

mire nazdīk to yaksāñ hai hastī-o-adam merā

kiyā betāb unheñ bhī garmī-e-soz-e-mohabbat ne

mujhī tak ab nahīñ mahdūd ai dil ranj-o-ġham merā

na aaya marte marte shikva-e-jaur-e-nihāñ lab tak

qayāmat tak kareñge tazkira ahl-e-sitam merā

charāġhāñ ka.aba-e-dil meñ kiyā 'mas.ūd' dāġhoñ ne

na dekhe rashk se muñh kis tarah sham-e-haram merā

dikhati hai meri tahrir eajaz-e-raqam mera

zaban-e-be-zaban ban ban ke chalta hai qalam mera

hua hai wajh-e-barbaadi wajud-e-kal-adam mera

milata hai mujhe miTTi mein har naqsh-e-qadam mera

subuk hunga na qatil ki subukdasti ke ehsan se

rahega roz-e-mahshar bhi sar-e-taslim KHam mera

gul-e-dagh-e-jigar ki qadr jannat mein hui ja kar

bahut mushtaq nikla bagh-e-firdaus-o-iram mera

na hone pai laghzish imtihan-gah-e-mohabbat mein

KHuda ka shukr hai sabit qadam nikla qadam mera

na jine ki KHushi mujh ko na kuchh marne ka andesha

mere nazdik to yaksan hai hasti-o-adam mera

kiya betab unhen bhi garmi-e-soz-e-mohabbat ne

mujhi tak ab nahin mahdud ai dil ranj-o-gham mera

na aaya marte marte shikwa-e-jaur-e-nihan lab tak

qayamat tak karenge tazkira ahl-e-sitam mera

charaghan kaba-e-dil mein kiya 'masud' daghon ne

na dekhe rashk se munh kis tarah sham-e-haram mera