dikhawe ke liye elan-e-faiz-e-am hota hai

dikhāve ke liye elān-e-faiz-e-ām hotā hai

magar ik ḳhaas hī halqa meñ daur-e-jām hotā hai

mo.arriḳh yuuñ jagah detā nahīñ tārīḳh-e-ālam meñ

baḌī qurbāniyoñ ke ba.ad paidā naam hotā hai

usī ko sochnā paḌtī haiñ tadbīreñ rihā.ī kī

jo taa.ir jurm-e-āzādī meñ zer-e-dām hotā hai

habāb-e-bahr kī sūrat ubharne kī zarūrat kyā

numūd-e-be-mahal kā jab burā anjām hotā hai

koī sarshār ho jaa.e koī ik buuñd ko tarse

inhīñ bātoñ se saaqī mai-kada badnām hotā hai

kahīñ sabze ko rauñdā jā rahā hai lahlahāne par

kahīñ phūloñ kā rañg-o-bū pe qatl-e-ām hotā hai

zabāñ kyuuñ kholte ho jurm ye duniyā hai ulfat kī

ishāroñ hī ishāroñ meñ yahāñ sab kaam hotā hai

dikhawe ke liye elan-e-faiz-e-am hota hai

magar ek KHas hi halqa mein daur-e-jam hota hai

moarriKH yun jagah deta nahin tariKH-e-alam mein

baDi qurbaniyon ke baad paida nam hota hai

usi ko sochna paDti hain tadbiren rihai ki

jo tair jurm-e-azadi mein zer-e-dam hota hai

habab-e-bahr ki surat ubharne ki zarurat kya

numud-e-be-mahal ka jab bura anjam hota hai

koi sarshaar ho jae koi ek bund ko tarse

inhin baaton se saqi mai-kada badnam hota hai

kahin sabze ko raunda ja raha hai lahlahane par

kahin phulon ka rang-o-bu pe qatl-e-am hota hai

zaban kyun kholte ho jurm ye duniya hai ulfat ki

ishaaron hi ishaaron mein yahan sab kaam hota hai