dikhla rahe ho lutf-e-bahaar-o-KHizan tumhin

dikhlā rahe ho lutf-e-bahār-o-ḳhizāñ tumhīñ

gul ho tumhīñ chaman ho tumhīñ bāġhbāñ tumhīñ

āñkhoñ meñ misl-e-rang-e-chaman ho ayaañ tumhīñ

dil meñ ho bū-e-gul kī tarah se zabāñ tumhīñ

kaisā hijāb kahte haiñ duniyā meñ kis ko husn

dar-parda le rahe ho mirā imtihāñ tumhīñ

dair-o-haram bhare haiñ tumhāre hī zikr se

donoñ jagah ho bā.is-e-shor-o-fuġhāñ tumhīñ

dariyā-e-ġham meñ Dūbne doge kisī ko kab

ho nā-ḳhudā-e-kashtī-e-be-bādbāñ tumhīñ

kis se kahūñ tumhāre sivā apne dil kī baat

mere to ho aniis tumhīñ rāz-dāñ tumhīñ

ham jānte haiñ saf.ha-e-hastī se rāt-din

har ek kā miTāte ho nām-o-nishāñ tumhīñ

ab jism-o-jāñ ko bhī nahīñ pahchāntā 'vahīd'

rahte ho us ke jism meñ mānind-e-jāñ tumhīñ

dikhla rahe ho lutf-e-bahaar-o-KHizan tumhin

gul ho tumhin chaman ho tumhin baghban tumhin

aankhon mein misl-e-rang-e-chaman ho ayan tumhin

dil mein ho bu-e-gul ki tarah se zaban tumhin

kaisa hijab kahte hain duniya mein kis ko husn

dar-parda le rahe ho mera imtihan tumhin

dair-o-haram bhare hain tumhaare hi zikr se

donon jagah ho bais-e-shor-o-fughan tumhin

dariya-e-gham mein Dubne doge kisi ko kab

ho na-KHuda-e-kashti-e-be-baadban tumhin

kis se kahun tumhaare siwa apne dil ki baat

mere to ho anis tumhin raaz-dan tumhin

hum jaante hain safha-e-hasti se raat-din

har ek ka miTate ho nam-o-nishan tumhin

ab jism-o-jaan ko bhi nahin pahchanta 'wahid'

rahte ho us ke jism mein manind-e-jaan tumhin