dikhlae na kyon hashr ka aalam shab-e-furqat

dikhlā.e na kyoñ hashr kā aalam shab-e-furqat

kuchh roz-e-qayāmat se nahīñ kam shab-e-furqat

barpā na ho kyoñ shevan-o-mātam shab-e-furqat

hai haq meñ mire roz-e-moharram shab-e-furqat

kartā hai falak dekh ke hālat mirī zaarī

ye charḳh se girtī nahīñ shabnam shab-e-furqat

ghabrā na bahut sā vo ab aatā hai ab aatā

detā huuñ dil-e-zār ko yuuñ dam shab-e-furqat

haiñ muḳhtalif alfāz magar ek haiñ ma.anī

zindāñ malak-ul-maut jahannam shab-e-furqat

maujūd ho jis meñ ki har ik tarah kī tā'zīb

sab kahte haiñ dozaḳh use aur ham shab-e-furqat

dil meñ mire mar jaate haiñ armān hazāroñ

barpā na hoñ kyuuñ na.ara-e-mātam shab-e-furqat

duniyā meñ sadā ranj se rāhat hai mo.aḳhḳhar

aur vasl kī shab par hai muqaddam shab-e-furqat

siina mirā kar detī hai afgār sitam-gar

sohrāb huuñ maiñ aur hai rustam shab-e-furqat

kyā pūchhtā hai kaun tire darpa.e-jāñ hai

ai monis-e-jāñ aur mirī hamdam shab-e-furqat

ai 'sehr' nahīñ jaan kī ab ḳhair tumhārī

aatī rahī gar yūñhī ye paiham shab-e-furqat

dikhlae na kyon hashr ka aalam shab-e-furqat

kuchh roz-e-qayamat se nahin kam shab-e-furqat

barpa na ho kyon shewan-o-matam shab-e-furqat

hai haq mein mere roz-e-moharram shab-e-furqat

karta hai falak dekh ke haalat meri zari

ye charKH se girti nahin shabnam shab-e-furqat

ghabra na bahut sa wo ab aata hai ab aata

deta hun dil-e-zar ko yun dam shab-e-furqat

hain muKHtalif alfaz magar ek hain mani

zindan malak-ul-maut jahannam shab-e-furqat

maujud ho jis mein ki har ek tarah ki ta'zib

sab kahte hain dozaKH use aur hum shab-e-furqat

dil mein mere mar jate hain arman hazaron

barpa na hon kyun nara-e-matam shab-e-furqat

duniya mein sada ranj se rahat hai moaKHKHar

aur wasl ki shab par hai muqaddam shab-e-furqat

sina mera kar deti hai afgar sitam-gar

sohrab hun main aur hai rustam shab-e-furqat

kya puchhta hai kaun tere darpae-jaan hai

ai monis-e-jaan aur meri hamdam shab-e-furqat

ai 'sehr' nahin jaan ki ab KHair tumhaari

aati rahi gar yunhi ye paiham shab-e-furqat