dil aag mein furqat ki jalta hai to jalne do

dil aag meñ furqat kī jaltā hai to jalne do

sho.ale ko mohabbat ke kuchh aur machalne do

manzil kī taḌap āḳhir pahuñchā.egī manzil tak

gir gir ke sañbhaltā huuñ gir gir ke sañbhalne do

be-rāh-ravī merī hai dars-e-amal mujh ko

uljhī huī rāhoñ pe chaltā huuñ to chalne do

duniyā ne badal Daalā mafhūm mohabbat kā

ab sāz-e-mohabbat kī āvāz badalne do

garmī-e-amal hogī phir merī rag-o-pai meñ

yaḳh-basta se jazboñ kī ye barf pighalne do

har raah pe bikhre haiñ angāre ta.assub ke

angāroñ pe chalnā hai angāroñ pe chalne do

is bāġh-e-vatan kī bhī kuchh fikr karo yaaro

lillāh ise bhī to kuchh phūlne phalne do

logo ye ġhanīmat hai kyoñ is ko bujhāte ho

ye sham-e-mohabbat hai din-rāt ise jalne do

aa.egī hayāt-e-nau 'maġhmūm' har ik dil meñ

paimāna-e-ātish meñ har sher ko Dhalne do

dil aag mein furqat ki jalta hai to jalne do

shoale ko mohabbat ke kuchh aur machalne do

manzil ki taDap aaKHir pahunchaegi manzil tak

gir gir ke sanbhalta hun gir gir ke sanbhalne do

be-rah-rawi meri hai dars-e-amal mujh ko

uljhi hui rahon pe chalta hun to chalne do

duniya ne badal Dala mafhum mohabbat ka

ab saz-e-mohabbat ki aawaz badalne do

garmi-e-amal hogi phir meri rag-o-pai mein

yaKH-basta se jazbon ki ye barf pighalne do

har rah pe bikhre hain angare tassub ke

angaron pe chalna hai angaron pe chalne do

is bagh-e-watan ki bhi kuchh fikr karo yaro

lillah ise bhi to kuchh phulne phalne do

logo ye ghanimat hai kyon is ko bujhate ho

ye sham-e-mohabbat hai din-raat ise jalne do

aaegi hayat-e-nau 'maghmum' har ek dil mein

paimana-e-atish mein har sher ko Dhalne do