dil agar dil hai to har haal mein ruswa hoga

dil agar dil hai to har haal meñ rusvā hogā

jab ġham-e-ishq na hogā ġham-e-duniyā hogā

aql Dartī hai ma.āl-e-ġham-e-dil kyā hogā

ishq kahtā hai ki har haal meñ jiinā hogā

luT gayā ishq kī nazroñ kā vo sāmān-e-shakeb

ab tirā husn jahāñ bhī ho tamāshā hogā

sāz-e-dil tishna-e-mizrāb hai māyūs na ho

ek din naġhma-e-ummīd bhī paidā hogā

shab-e-ġham aah ye andoh ye uljhan ye taḌap

sochtā huuñ ki ma.āl-e-shab-e-ġham kyā hogā

dil hai aur talḳhī-e-ġham haath haiñ aur sāġhar-e-mai

kyā ḳhabar thī hameñ ye zahr bhī piinā hogā

vo dilā.eñ to jafāoñ ke tasalsul kā yaqīñ

is se baḌh kar koī in.ām-e-vafā kyā hogā

aane vaalī hai mohabbat kī vo manzil 'shāhid'

jab hameñ yaas pe ummīd kā dhokā hogā

dil agar dil hai to har haal mein ruswa hoga

jab gham-e-ishq na hoga gham-e-duniya hoga

aql Darti hai maal-e-gham-e-dil kya hoga

ishq kahta hai ki har haal mein jina hoga

luT gaya ishq ki nazron ka wo saman-e-shakeb

ab tera husn jahan bhi ho tamasha hoga

saz-e-dil tishna-e-mizrab hai mayus na ho

ek din naghma-e-ummid bhi paida hoga

shab-e-gham aah ye andoh ye uljhan ye taDap

sochta hun ki maal-e-shab-e-gham kya hoga

dil hai aur talKHi-e-gham hath hain aur saghar-e-mai

kya KHabar thi hamein ye zahr bhi pina hoga

wo dilaen to jafaon ke tasalsul ka yaqin

is se baDh kar koi inam-e-wafa kya hoga

aane wali hai mohabbat ki wo manzil 'shahid'

jab hamein yas pe ummid ka dhoka hoga