dil agar ishq ka shikar nahin

dil agar ishq kā shikār nahīñ

jalva-gāh-e-jamāl-e-yār nahīñ

dhoke khaa.e haiñ is qadar dil ne

ab nazar par bhī e.atibār nahīñ

dard letā hai karvaTeñ paiham

kisī pahlū bhī ab qarār nahīñ

ye sulagtī hai andar andar hī

ātish-e-ishq sho.ala-bār nahīñ

be-ḳhudī shauq kī ma.āz-allāh

sāmne vo aur e.atibār nahīñ

bas bas ai vahshat-e-dilī bas bas

jeb meñ baaqī ek taar nahīñ

ham se nākāmoñ kī javānī kyā

hai ḳhizāñ hī ḳhizāñ bahār nahīñ

mohtasib kyoñ chhupe haiñ bint-e-inab

terī niyyat kā e.atibār nahīñ

hai ishāre kuchh aur āñkhoñ ke

muñh se kah deñ vo laakh baar nahīñ

ik havā hai chalī chalī na chalī

zindagī kā kuchh e.atibār nahīñ

un kī bātoñ meñ aa ga.e 'navvāb'

jin kī bātoñ kā e.atibār nahīñ

dil agar ishq ka shikar nahin

jalwa-gah-e-jamal-e-yar nahin

dhoke khae hain is qadar dil ne

ab nazar par bhi eatibar nahin

dard leta hai karwaTen paiham

kisi pahlu bhi ab qarar nahin

ye sulagti hai andar andar hi

aatish-e-ishq shoala-bar nahin

be-KHudi shauq ki maaz-allah

samne wo aur eatibar nahin

bas bas ai wahshat-e-dili bas bas

jeb mein baqi ek tar nahin

hum se nakaamon ki jawani kya

hai KHizan hi KHizan bahaar nahin

mohtasib kyon chhupe hain bint-e-inab

teri niyyat ka eatibar nahin

hai ishaare kuchh aur aankhon ke

munh se kah den wo lakh bar nahin

ek hawa hai chali chali na chali

zindagi ka kuchh eatibar nahin

un ki baaton mein aa gae 'nawwab'

jin ki baaton ka eatibar nahin