dil ai dil ye tarz nahin kuchh ishq ke ohde-daron ki

dil ai dil ye tarz nahīñ kuchh ishq ke ohde-dāroñ kī

sunte ho majbūroñ kī aur kahte ho muḳhtāroñ kī

phir maujoñ se chīḳh sī uTThī mujh ko to ye dhokā hai

ga.ī raat bhī patvāroñ se ḳhuub nibhī mañjdhāroñ kī

yaad dilā dī hai sūraj ke ās-pās ik badlī ne

kaalī qamīsoñ ke saa.e meñ dhuup saped ġharāroñ kī

pīpal ke pattoñ ke saa.e kab tak tumheñ sarāheñge

ek na ik din qismat jaag uThegī rāh-guzāroñ kī

ai gul-e-dāman-e-rashk-e-gulistāñ ham se hamārā haal na pūchh

sehn-e-chaman ke vīrānoñ meñ sūrat dekh bahāroñ kī

ik bujhtī lakḌī se ik sho.ala lahrāyā hai jis vaqt

ḳhāna-ba-doshoñ ke ḳheme meñ baat chhiḌī maTiyāroñ kī

tere hijr meñ jaam na khankeñ patta na khaḌke aah na ho

kis dariyā meñ Duub mareñ āvāzeñ chaukī-dāroñ kī

us be-ruḳh ne bedardī se rātoñ rātoñ rulvāyā

dard kā had se baḌh jaanā Thahrī jo davā bīmāroñ kī

aao ik do pal sustā leñ maazī kī dīvār tale

sej bhī hai nauras kaliyoñ kī barkhā bhī añgāroñ kī

aise kahāñ nasīb hamāre bāyāñ añg phaḌak uTThe

kaun ḳhabar hai dukhiyā jaag meñ ham paapī dukhiyāroñ kī

ham ko kisī se gilā nahīñ hai jaan ga.e pahchān ga.e

vīrāñ diloñ ke vīrāne haiñ duniyā duniyā-dāroñ kī

ek zamāna guzrā ham bhī tere shahr ke baasī the

aaj bhī āñkhoñ meñ phirtī hai sūrat tere dayāroñ kī

go qadmoñ se judā hue vo rāh-guzāreñ der huī

lekin dil par jam sī ga.ī hai dhuul in rāh-guzāroñ kī

ḳhair un dinoñ to chāk-garebānoñ kī izzat hotī thī

aaj to ḳhair se tere shahr meñ izzat hai dastāroñ kī

'ashk' mire ash.ār ke ātish-pāroñ se dhīre dhīre

bastī bastī phail rahī hai aañch in ke ruḳhsāroñ kī

dil ai dil ye tarz nahin kuchh ishq ke ohde-daron ki

sunte ho majburon ki aur kahte ho muKHtaron ki

phir maujon se chiKH si uTThi mujh ko to ye dhoka hai

gai raat bhi patwaron se KHub nibhi manjdhaaron ki

yaad dila di hai suraj ke aas-pas ek badli ne

kali qamison ke sae mein dhup saped ghararon ki

pipal ke patton ke sae kab tak tumhein sarahenge

ek na ek din qismat jag uThegi rah-guzaron ki

ai gul-e-daman-e-rashk-e-gulistan hum se hamara haal na puchh

sehn-e-chaman ke viranon mein surat dekh bahaaron ki

ek bujhti lakDi se ek shoala lahraya hai jis waqt

KHana-ba-doshon ke KHeme mein baat chhiDi maTiyaron ki

tere hijr mein jam na khanken patta na khaDke aah na ho

kis dariya mein Dub maren aawazen chauki-daron ki

us be-ruKH ne bedardi se raaton raaton rulwaya

dard ka had se baDh jaana Thahri jo dawa bimaron ki

aao ek do pal susta len mazi ki diwar tale

sej bhi hai nauras kaliyon ki barkha bhi angaron ki

aise kahan nasib hamare bayan ang phaDak uTThe

kaun KHabar hai dukhiya jag mein hum papi dukhiyaron ki

hum ko kisi se gila nahin hai jaan gae pahchan gae

viran dilon ke virane hain duniya duniya-daron ki

ek zamana guzra hum bhi tere shahr ke basi the

aaj bhi aankhon mein phirti hai surat tere dayaron ki

go qadmon se juda hue wo rah-guzaren der hui

lekin dil par jam si gai hai dhul in rah-guzaron ki

KHair un dinon to chaak-garebanon ki izzat hoti thi

aaj to KHair se tere shahr mein izzat hai dastaron ki

'ashk' mere ashaar ke aatish-paron se dhire dhire

basti basti phail rahi hai aanch in ke ruKHsaron ki