dil apna yaad-e-yar se begana to nahin

dil apnā yād-e-yār se begāna to nahīñ

goyā ki ḳhālī mai se ye paimāna to nahīñ

mantā hai merī baat to nazreñ milā ke sun

ye merā hāl-e-zār hai afsāna to nahīñ

hañste ho mil ke duniyā se kyā mere haal par

maiñ aap kā dīvāna huuñ dīvāna to nahīñ

ai sham.a tujh ko jalnā hai ab us kī aag meñ

ik sho.ala tujh se lipTā hai parvāna to nahīñ

dānista mujh se jaatā hai ġhairoñ ke sāmne

varna vo mere haal se begāna to nahīñ

ai barq tujh ko dhokā huā mujh ko dekh kar

zālim qafas hai ye merā kāshāna to nahīñ

taskīn-e-ḳhulq-e-sāqī ko piitā huuñ maiñ sharāb

merī nazar meñ saaqī hai paimāna to nahīñ

pās-e-adab hai kyā uThe aañkh is ke rū-ba-rū

is meñ savāl-e-jur.at-e-rindāna to nahīñ

jhukte haiñ us ko har jagah maujūd pā ke 'soz'

dil meñ hamāre ka.aba-o-but-ḳhāna to nahīñ

dil apna yaad-e-yar se begana to nahin

goya ki KHali mai se ye paimana to nahin

manta hai meri baat to nazren mila ke sun

ye mera haal-e-zar hai afsana to nahin

hanste ho mil ke duniya se kya mere haal par

main aap ka diwana hun diwana to nahin

ai shama tujh ko jalna hai ab us ki aag mein

ek shoala tujh se lipTa hai parwana to nahin

danista mujh se jata hai ghairon ke samne

warna wo mere haal se begana to nahin

ai barq tujh ko dhoka hua mujh ko dekh kar

zalim qafas hai ye mera kashana to nahin

taskin-e-KHulq-e-saqi ko pita hun main sharab

meri nazar mein saqi hai paimana to nahin

pas-e-adab hai kya uThe aankh is ke ru-ba-ru

is mein sawal-e-jurat-e-rindana to nahin

jhukte hain us ko har jagah maujud pa ke 'soz'

dil mein hamare kaba-o-but-KHana to nahin