dil aur kahin par hai to sar aur kahin par

dil aur kahīñ par hai to sar aur kahīñ par

vo sajda nahīñ daaġh hai dāmān-e-zamīñ par

qurbān tirī haañ pe tasadduq huuñ nahīñ par

sarmāya-e-hastī ko luTātā huuñ yahīñ par

naqsh-e-qadam-e-yār numāyāñ hai jabīñ par

shak hone lagā ab to mire maz.hab-o-dīñ par

hai sajda-e-iḳhlās kā adnā sā karishma

maiñ farsh-e-zamīñ par huuñ to sar arsh-e-barīñ par

tasvīr 'musavvir' ne jo khīñchī hai kisī kī

hūreñ na utar aa.eñ pa-e-dīd zamīñ par

dil aur kahin par hai to sar aur kahin par

wo sajda nahin dagh hai daman-e-zamin par

qurban teri han pe tasadduq hun nahin par

sarmaya-e-hasti ko luTata hun yahin par

naqsh-e-qadam-e-yar numayan hai jabin par

shak hone laga ab to mere mazhab-o-din par

hai sajda-e-iKHlas ka adna sa karishma

main farsh-e-zamin par hun to sar arsh-e-barin par

taswir 'musawwir' ne jo khinchi hai kisi ki

huren na utar aaen pa-e-did zamin par