dil be-qarar kyon na ho naKHchir ki tarah

dil be-qarār kyoñ na ho naḳhchīr kī tarah

chubhtī hai gul-ruḳhoñ kī nazar tiir kī tarah

rāñjhe kī tarh qaid huuñ apne makān meñ

chupke se dekhtā hai koī hiir kī tarah

pūchhā bhī us ne haal hamārā to ġhair se

yā'nī hai iltifāt bhī tā'zīr kī tarah

donoñ kā ek haal hai pursāñ nahīñ koī

hai shām-e-ġham bhī ‘āshiq-e-dil-gīr kī tarah

hairān huuñ maiñ sūrat-e-ā.īna ai 'shakīl'

baiThā hai sāmne koī tasvīr kī tarah

dil be-qarar kyon na ho naKHchir ki tarah

chubhti hai gul-ruKHon ki nazar tir ki tarah

ranjhe ki tarh qaid hun apne makan mein

chupke se dekhta hai koi hir ki tarah

puchha bhi us ne haal hamara to ghair se

ya'ni hai iltifat bhi ta'zir ki tarah

donon ka ek haal hai pursan nahin koi

hai sham-e-gham bhi ‘ashiq-e-dil-gir ki tarah

hairan hun main surat-e-aina ai 'shakil'

baiTha hai samne koi taswir ki tarah