dil bhar aae aur abr-e-dida mein pani na ho

dil bhar aa.e aur abr-e-dīda meñ paanī na ho

ye zamīñ sahrā dikhā.ī de jo bārānī na ho

shauq itnā sahl kyuuñ us paar le jaa.e mujhe

phir palaT aa.uuñ agar dariyā meñ tuġhyānī na ho

kaan bajte haiñ havā kī sīTiyoñ par rāt-bhar

chauñk uThtā huuñ ki aahaT jānī-pahchānī na ho

ho ga.e be-ḳhud to Tīsoñ kā maza chhin jā.egā

roktā huuñ dard kī itnī farāvānī na ho

tere hone se mire dil meñ hai yādoñ kī chamak

chāñd bujh jaa.e agar sūraj meñ tābānī na ho

Dhāñp le miTTī se tan apnā agar maqdūr ho

pairahan kaisā agar ehsās-e-uryānī na ho

jī rahā huuñ maiñ ki auroñ se bhī hai vābastagī

maut aa jaa.e agar koī pareshānī na ho

Daal de 'shāhid' shafaq par raat kī kaalī ridā

mere darvāze se zāhir ghar kī vīrānī na ho

dil bhar aae aur abr-e-dida mein pani na ho

ye zamin sahra dikhai de jo barani na ho

shauq itna sahl kyun us par le jae mujhe

phir palaT aaun agar dariya mein tughyani na ho

kan bajte hain hawa ki siTiyon par raat-bhar

chaunk uThta hun ki aahaT jaani-pahchani na ho

ho gae be-KHud to Tison ka maza chhin jaega

rokta hun dard ki itni farawani na ho

tere hone se mere dil mein hai yaadon ki chamak

chand bujh jae agar suraj mein tabani na ho

Dhanp le miTTi se tan apna agar maqdur ho

pairahan kaisa agar ehsas-e-uryani na ho

ji raha hun main ki auron se bhi hai wabastagi

maut aa jae agar koi pareshani na ho

Dal de 'shahid' shafaq par raat ki kali rida

mere darwaze se zahir ghar ki virani na ho