dil bhi tanha rahta hai aur meri talab tanha

dil bhī tanhā rahtā hai aur mirī talab tanhā

āñsuoñ ke mele meñ rahtī huuñ maiñ ab tanhā

ḳhalvatoñ ko hai merī kis qadar hasīñ nisbat

maiñ zamīñ pe tanhā huuñ arsh par hai rab tanhā

ik shajar thā sahrā meñ dhuup thī kaḌī jis par

Dhal gayā thā saaya bhī rah gayā vo jab tanhā

kyā tujhe ḳhabar bhī hai hijr kī havelī meñ

raat bhar taḌaptā hai koī tishna-lab tanhā

titlī chiḌiyā parvāne chāñd sūraj aur jugnū

apnī apnī duniyā meñ phir rahe haiñ sab tanhā

zindagī se baḌh kar thī qīmtī jo shab merī

chashm-e-tar meñ Duubī sī kaT ga.ī vo shab tanhā

dair ho yā ka.aba ho kis kī justujū meñ ye

phir rahā hai sadiyoñ se ishq kā nasab tanhā

yaad ke jharokoñ se ik sadā sī aatī hai

umr ke kaThin lamhe kaTte haiñ ye kab tanhā

kuchh ajab savāloñ meñ jaane kin ḳhayāloñ meñ

koī rotā rahtā hai yūñhī be-sabab tanhā

sach ko chhoḌne vaale fikr kyoñ nahīñ karte

jal rahā hai dozaḳh meñ kab se bū-lahab tanhā

tab huā ujāgar ye fikr-o-fan shafaq merā

qabr ke añdheroñ meñ rah ga.ī maiñ jab tanhā

dil bhi tanha rahta hai aur meri talab tanha

aansuon ke mele mein rahti hun main ab tanha

KHalwaton ko hai meri kis qadar hasin nisbat

main zamin pe tanha hun arsh par hai rab tanha

ek shajar tha sahra mein dhup thi kaDi jis par

Dhal gaya tha saya bhi rah gaya wo jab tanha

kya tujhe KHabar bhi hai hijr ki haweli mein

raat bhar taDapta hai koi tishna-lab tanha

titli chiDiya parwane chand suraj aur jugnu

apni apni duniya mein phir rahe hain sab tanha

zindagi se baDh kar thi qimti jo shab meri

chashm-e-tar mein Dubi si kaT gai wo shab tanha

dair ho ya kaba ho kis ki justuju mein ye

phir raha hai sadiyon se ishq ka nasab tanha

yaad ke jharokon se ek sada si aati hai

umr ke kaThin lamhe kaTte hain ye kab tanha

kuchh ajab sawalon mein jaane kin KHayalon mein

koi rota rahta hai yunhi be-sabab tanha

sach ko chhoDne wale fikr kyon nahin karte

jal raha hai dozaKH mein kab se bu-lahab tanha

tab hua ujagar ye fikr-o-fan shafaq mera

qabr ke andheron mein rah gai main jab tanha