dil bujh gaya nigah-e-KHaridar dekh kar

dil bujh gayā nigāh-e-ḳharīdār dekh kar

ya.anī havas kī garmī-e-bāzār dekh kar

dekhā nigāh-e-qahr se dāvar ne roz-e-hashr

phir hans paḌā vo shakl-e-gunahgār dekh kar

nāzuk se haath narm kalā.ī zarā sā dil

hañstā huuñ un ke hāthoñ meñ talvār dekh kar

gardish pe ho gayā thā bahut āsmāñ ko naaz

chakkar meñ aa gayā tirī raftār dekh kar

rokī ga.ī na kātib-e-taqdīr se hañsī

terī zabāñ pe vasl kā iqrār dekh kar

paidā huī hai tark-e-mohabbat kī aarzū

har bul-havas ko us kā ḳharīdār dekh kar

har roz zindagī na.ī miltī hai ishq meñ

martā huuñ varna maiñ unheñ har baar dekh kar

'sāhir' buland-o-past se thī shaaq rah-ravī

dil munfa.il hai raah ko hamvār dekh kar

dil bujh gaya nigah-e-KHaridar dekh kar

yani hawas ki garmi-e-bazar dekh kar

dekha nigah-e-qahr se dawar ne roz-e-hashr

phir hans paDa wo shakl-e-gunahgar dekh kar

nazuk se hath narm kalai zara sa dil

hansta hun un ke hathon mein talwar dekh kar

gardish pe ho gaya tha bahut aasman ko naz

chakkar mein aa gaya teri raftar dekh kar

roki gai na katib-e-taqdir se hansi

teri zaban pe wasl ka iqrar dekh kar

paida hui hai tark-e-mohabbat ki aarzu

har bul-hawas ko us ka KHaridar dekh kar

har roz zindagi nai milti hai ishq mein

marta hun warna main unhen har bar dekh kar

'sahir' buland-o-past se thi shaq rah-rawi

dil munfail hai rah ko hamwar dekh kar