dil chaak karo ho na jigar chaak karo ho

dil chaak karo ho na jigar chaak karo ho

tum phir bhī lahū-rang ye poshāk karo ho

ab tum se sañbhāle nahīñ jaate ye ḳham-o-pech

kyā fā.eda zulfoñ se jo pechāk karo ho

pairoñ kī dhamak se to na ulTī ye zamīñ bhī

kyā zer-e-qadam sarhad-e-aflāk karo ho

ye jism bhī kal munsifī chāhegā yaqīnan

tum raakh karo ho yā ise ḳhaak karo ho

bik jāoge ik din usī ma.asūm ke hāthoñ

tum jis kisī ma.asūm ko chālāk karo ho

haiñ zāġh-o-zaġhan taak meñ nazroñ ko gaḌā.e

kab kisht-e-badan tum ḳhas-o-ḳhāshāk karo ho

'ḳhusrav' kabhī ḳhud is kā maza tum bhī to chakkho

jo nok-e-zabāñ ḳhanjar-e-saffāk karo ho

dil chaak karo ho na jigar chaak karo ho

tum phir bhi lahu-rang ye poshak karo ho

ab tum se sanbhaale nahin jate ye KHam-o-pech

kya faeda zulfon se jo pechaak karo ho

pairon ki dhamak se to na ulTi ye zamin bhi

kya zer-e-qadam sarhad-e-aflak karo ho

ye jism bhi kal munsifi chahega yaqinan

tum rakh karo ho ya ise KHak karo ho

bik jaoge ek din usi masum ke hathon

tum jis kisi masum ko chaalak karo ho

hain zagh-o-zaghan tak mein nazron ko gaDae

kab kisht-e-badan tum KHas-o-KHashak karo ho

'KHusraw' kabhi KHud is ka maza tum bhi to chakkho

jo nok-e-zaban KHanjar-e-saffak karo ho