dil-e-barham ki KHatir muddaa kuchh bhi nahin hota

dil-e-barham kī ḳhātir mudda.ā kuchh bhī nahīñ hotā

ajab hālat hai ab shikva gilā kuchh bhī nahīñ hotā

koī sūrat ubhartī hai na maiñ mismār hotā huuñ

maiñ vo patthar ki jis kā faisla kuchh bhī nahīñ hotā

kisī ko saath le lenā kisī ke saath ho lenā

faqīroñ ke liye achchhā burā kuchh bhī nahīñ hotā

kabhī chalnā mire aage kabhī rahnā mire pīchhe

rah-e-ulfat meñ chhoTā yā baḌā kuchh bhī nahīñ hotā

kabhī dil meñ mire tere sivā har baat hotī hai

kabhī dil meñ mire tere sivā kuchh bhī nahīñ hotā

vahī TuuTī huī kashtī vahī pāgal havā.eñ haiñ

hamāre saath duniyā meñ nayā kuchh bhī nahīñ hotā

ye saudā hai nigāhoñ kā tijārat dil kī hai lekin

mohabbat meñ ḳhasāra fā.eda kuchh bhī nahīñ hotā

kabhī do chaar qadmoñ kā safar tai ho nahīñ paatā

kabhī mīloñ se lambā fāsla kuchh bhī nahīñ hotā

faqat kirdār kā maarā huā hai har bashar varna

koī insān achchhā yā burā kuchh bhī nahīñ hotā

falak par hī sitāroñ kā koī unvān hotā hai

kisī TuuTe sitāre kā pata kuchh bhī nahīñ hotā

bhale ḳhvāhish karūñ terī kisī bhī shakl meñ lekin

mirā maqsad parastish ke sivā kuchh bhī nahīñ hotā

agar dekhūñ to ḳhāmī hī dikhā.ī de har ik shai meñ

agar sochūñ to ḳhud se bad-numā kuchh bhī nahīñ hotā

ba-zāhir umr-bhar yuuñ to hazāroñ kaam karte haiñ

haqīqat meñ magar ham ne kiyā kuchh bhī nahīñ hotā

dil-e-barham ki KHatir muddaa kuchh bhi nahin hota

ajab haalat hai ab shikwa gila kuchh bhi nahin hota

koi surat ubharti hai na main mismar hota hun

main wo patthar ki jis ka faisla kuchh bhi nahin hota

kisi ko sath le lena kisi ke sath ho lena

faqiron ke liye achchha bura kuchh bhi nahin hota

kabhi chalna mere aage kabhi rahna mere pichhe

rah-e-ulfat mein chhoTa ya baDa kuchh bhi nahin hota

kabhi dil mein mere tere siwa har baat hoti hai

kabhi dil mein mere tere siwa kuchh bhi nahin hota

wahi TuTi hui kashti wahi pagal hawaen hain

hamare sath duniya mein naya kuchh bhi nahin hota

ye sauda hai nigahon ka tijarat dil ki hai lekin

mohabbat mein KHasara faeda kuchh bhi nahin hota

kabhi do chaar qadmon ka safar tai ho nahin pata

kabhi milon se lamba fasla kuchh bhi nahin hota

faqat kirdar ka mara hua hai har bashar warna

koi insan achchha ya bura kuchh bhi nahin hota

falak par hi sitaron ka koi unwan hota hai

kisi TuTe sitare ka pata kuchh bhi nahin hota

bhale KHwahish karun teri kisi bhi shakl mein lekin

mera maqsad parastish ke siwa kuchh bhi nahin hota

agar dekhun to KHami hi dikhai de har ek shai mein

agar sochun to KHud se bad-numa kuchh bhi nahin hota

ba-zahir umr-bhar yun to hazaron kaam karte hain

haqiqat mein magar hum ne kiya kuchh bhi nahin hota