dil-e-be-muddaa ne mar Dala

dil-e-be-mudda.ā ne maar Daalā

mujhe merī hayā ne maar Daalā

qazā ko chāhiye thā ik bahāna

mujhe terī duā ne maar Daalā

jise paalā thā tere gesuoñ ne

use bād-e-sabā ne maar Daalā

zamāne kī havā kab raas aa.ī

zamāne kī havā ne maar Daalā

jise apnā samajh ke dil lagāyā

usī dair-āshnā ne maar Daalā

mujhe to maar saktā thā na koī

mohabbat kī adā ne maar Daalā

talāsh-e-yār meñ phirtā huuñ kab se

kisī ke naqsh-e-pā ne maar Daalā

buzurgoñ kī duā se bach gayā thā

mujhe merī duā ne maar Daalā

'rafīq' ik roz to marnā hai lekin

kisī rangīñ adā ne maar Daalā

dil-e-be-muddaa ne mar Dala

mujhe meri haya ne mar Dala

qaza ko chahiye tha ek bahana

mujhe teri dua ne mar Dala

jise pala tha tere gesuon ne

use baad-e-saba ne mar Dala

zamane ki hawa kab ras aai

zamane ki hawa ne mar Dala

jise apna samajh ke dil lagaya

usi dair-ashna ne mar Dala

mujhe to mar sakta tha na koi

mohabbat ki ada ne mar Dala

talash-e-yar mein phirta hun kab se

kisi ke naqsh-e-pa ne mar Dala

buzurgon ki dua se bach gaya tha

mujhe meri dua ne mar Dala

'rafiq' ek roz to marna hai lekin

kisi rangin ada ne mar Dala