dil-e-be-qaid ne ba-nur-e-iman kafiri ki hai

dil-e-be-qaid ne bā-nūr-e-īmāñ kāfirī kī hai

haram meñ sar jhukāyā hai butoñ kī chākarī kī hai

ba-sad bechārgī roz-e-azal se ibn-e-ādam ne

ḳhudā ke har tasavvur par kisī kī but-garī kī hai

ḳhudā shāhid inhīñ hāthoñ ne toḌe haiñ hazāroñ but

ḳhudā shāhid inhīñ hāthoñ ne aksar āzarī kī hai

matā.a-e-bandagī baḳhshish kī ḳhātir le kar aaya thā

sar-e-mahshar ḳhudā ke saath bhī saudāgarī kī hai

mashiyyat thī rahe majbūr-e-mahkūmī amal mere

kabhī kī hai azāzīlī kabhī paiġhambarī kī hai

bas ik dar ke sivā ye sar kahīñ jhukne nahīñ paayā

faqīrī meñ bhī is dil ne baḌī iskandarī kī hai

kabhī tārīḳh-sāzī kī kabhī afsāne bun Daale

kabhī 'sālik' ne un kī yaad meñ kuchh shā.irī kī hai

dil-e-be-qaid ne ba-nur-e-iman kafiri ki hai

haram mein sar jhukaya hai buton ki chaakari ki hai

ba-sad bechaargi roz-e-azal se ibn-e-adam ne

KHuda ke har tasawwur par kisi ki but-gari ki hai

KHuda shahid inhin hathon ne toDe hain hazaron but

KHuda shahid inhin hathon ne aksar aazari ki hai

mataa-e-bandagi baKHshish ki KHatir le kar aaya tha

sar-e-mahshar KHuda ke sath bhi saudagari ki hai

mashiyyat thi rahe majbur-e-mahkumi amal mere

kabhi ki hai azazili kabhi paighambari ki hai

bas ek dar ke siwa ye sar kahin jhukne nahin paya

faqiri mein bhi is dil ne baDi iskandari ki hai

kabhi tariKH-sazi ki kabhi afsane bun Dale

kabhi 'salik' ne un ki yaad mein kuchh shairi ki hai