dil-e-be-qarar ki marifat baDi ehtiyat ka kaam hai

dil-e-be-qarār kī mā'rifat baḌī ehtiyāt kā kaam hai

yahī un kī ḳhalvat-e-nāz hai yahī dūsroñ kā maqām hai

maiñ to muddatoñ se huuñ muntazir ki shab-e-firāq kī ho sahar

magar is nasīb ko kyā karūñ na salām hai na payām hai

vo hazār tarh haiñ jalva-gar kabhī is jagah kabhī us jagah

unheñ ḳhud-numā.ī kā shauq hai mirī justujū kā to naam hai

na dil-o-nigāh pe apnā bas na ḳhayāl par mirī dastaras

kabhī vo hī vo kabhī maiñ hī maiñ ye baḌā 'ajīb maqām hai

kabhī zulmatoñ meñ thī raushnī kabhī raushnī meñ haiñ zulmateñ

ye haiñ inqalāb kī karvaTeñ jahāñ sub.h thī vahīñ shaam hai

lab-e-shikva bhī na hilā sakūñ unheñ hāl-e-ġham na sunā sakūñ

jise maut kahte haiñ 'ishq meñ isī be-kasī kā to naam hai

ye to 'maikash' ek fareb hai nahīñ mai-kade meñ ye sarḳhushī

tū nigāh apne hī dil pe rakh yahī baada hai yahī jaam hai

dil-e-be-qarar ki ma'rifat baDi ehtiyat ka kaam hai

yahi un ki KHalwat-e-naz hai yahi dusron ka maqam hai

main to muddaton se hun muntazir ki shab-e-firaq ki ho sahar

magar is nasib ko kya karun na salam hai na payam hai

wo hazar tarh hain jalwa-gar kabhi is jagah kabhi us jagah

unhen KHud-numai ka shauq hai meri justuju ka to nam hai

na dil-o-nigah pe apna bas na KHayal par meri dastaras

kabhi wo hi wo kabhi main hi main ye baDa 'ajib maqam hai

kabhi zulmaton mein thi raushni kabhi raushni mein hain zulmaten

ye hain inqalab ki karwaTen jahan subh thi wahin sham hai

lab-e-shikwa bhi na hila sakun unhen haal-e-gham na suna sakun

jise maut kahte hain 'ishq mein isi be-kasi ka to nam hai

ye to 'maikash' ek fareb hai nahin mai-kade mein ye sarKHushi

tu nigah apne hi dil pe rakh yahi baada hai yahi jam hai