dil-e-betab ka payam liya

dil-e-betāb kā payām liyā

phir kisī ne mirā salām liyā

ruuTh kar ham se tū ne ai zālim

kis ḳhatā kā hai intiqām liyā

ho ke majbūr josh-e-ulfat se

ham ne dāman kisī kā thaam liyā

phuul jhaḌne lage zabāñ se mirī

jab kisī gul-badan kā naam liyā

kaam aa.e na aql-o-hosh jahāñ

ham ne dīvāngī se kaam liyā

Dagmagāte hue mire dil ko

us hasīñ ajnabī ne thaam liyā

shiddat-e-ranj-o-ġham meñ ai 'nayyar'

ham ne jām-o-subū se kaam liyā

dil-e-betab ka payam liya

phir kisi ne mera salam liya

ruTh kar hum se tu ne ai zalim

kis KHata ka hai intiqam liya

ho ke majbur josh-e-ulfat se

hum ne daman kisi ka tham liya

phul jhaDne lage zaban se meri

jab kisi gul-badan ka nam liya

kaam aae na aql-o-hosh jahan

hum ne diwangi se kaam liya

Dagmagate hue mere dil ko

us hasin ajnabi ne tham liya

shiddat-e-ranj-o-gham mein ai 'nayyar'

hum ne jam-o-subu se kaam liya