dil-e-betab mera wo na phansane pae

dil-e-betāb mirā vo na phañsāne paa.e

do hī jhaTke jo zarā zulf-e-dotā ne paa.e

hāth-pā.ī huī maiḳhāne meñ zāhid se kahīñ

ham ne tasbīh ke bikhre hue daane paa.e

chheḌ manzūr na ho tujh ko to mizhgāñ terī

dil-e-betāb ko unglī na lagāne paa.e

jal gayā kyā mirī ātish-qadamī se jangal

chaar tinke na kahīñ bād-e-sabā ne paa.e

ham ne apnā dil-e-gum-gashta na paaya kho kar

varna yaañ DhūñDhne vāloñ ne ḳhazāne paa.e

lā shab-e-va.ada use khīñch ke ai jazba-e-dil

hīla-jū paañv meñ meñhdī na lagāne paa.e

huur ke vāste zāhid ne ibādat kī hai

sair to jab hai ki jannat meñ na jaane paa.e

dil-e-betab mera wo na phansane pae

do hi jhaTke jo zara zulf-e-dota ne pae

hath-pai hui maiKHane mein zahid se kahin

hum ne tasbih ke bikhre hue dane pae

chheD manzur na ho tujh ko to mizhgan teri

dil-e-betab ko ungli na lagane pae

jal gaya kya meri aatish-qadami se jangal

chaar tinke na kahin baad-e-saba ne pae

hum ne apna dil-e-gum-gashta na paya kho kar

warna yan DhunDhne walon ne KHazane pae

la shab-e-wada use khinch ke ai jazba-e-dil

hila-ju panw mein meinhdi na lagane pae

hur ke waste zahid ne ibaadat ki hai

sair to jab hai ki jannat mein na jaane pae