dil-e-dard-ashna rakkhe hue hain

dil-e-dard-āshnā rakkhe hue haiñ

badan meñ karbalā rakkhe hue haiñ

kisī ke rang meñ Dhalte nahīñ haiñ

ham apnī kīmiyā rakkhe hue haiñ

hamīñ tafhīm-e-duniyā ke muamme

ḳhalā andar ḳhalā rakkhe hue haiñ

koī manzil nahīñ manzil hamārī

ik ātish zer-e-pā rakkhe hue haiñ

laḌā.ī zulmat-e-shab se hai jaarī

sar-e-bām ik diyā rakkhe hue haiñ

hamāre sāmne haiñ par vo yuuñ haiñ

na hone kī adā rakkhe hue haiñ

jo mausam pahn kar aa.e haiñ sūraj

vo dāman meñ ghaTā rakkhe hue haiñ

dalīl-e-ḳhāmushī kaam aa rahī hai

kisī ko be-navā rakkhe hue haiñ

dil-e-dard-ashna rakkhe hue hain

badan mein karbala rakkhe hue hain

kisi ke rang mein Dhalte nahin hain

hum apni kimiya rakkhe hue hain

hamin tafhim-e-duniya ke muamme

KHala andar KHala rakkhe hue hain

koi manzil nahin manzil hamari

ek aatish zer-e-pa rakkhe hue hain

laDai zulmat-e-shab se hai jari

sar-e-baam ek diya rakkhe hue hain

hamare samne hain par wo yun hain

na hone ki ada rakkhe hue hain

jo mausam pahn kar aae hain suraj

wo daman mein ghaTa rakkhe hue hain

dalil-e-KHamushi kaam aa rahi hai

kisi ko be-nawa rakkhe hue hain