dil-e-fasurda use kyun gale laga na liya

dil-e-fasurda use kyuuñ gale lagā na liyā

qarīb rah ke bhī jis ne tirā patā na liyā

bas ek lamhe meñ kyā kuchh guzar ga.ī dil par

bahāl hote hue ham ne ik zamāna liyā

kisī bhī haal meñ pahuñche to haiñ kināre par

yahī bahut hai ki ehsān-e-nāḳhudā na liyā

ḳhayāl aayā ravāna hue safar ke liye

na ham ne raḳht hī bāñdhā na āb-o-dāna liyā

maiñ jī rahā huuñ magar yād-e-raftagāñ kī tarah

mujhe ga.e hue lamhoñ ne kyuuñ bulā na liyā

tamām umr havā phāñkte hue guzrī

rahe zamīñ pe magar ḳhaak kā mazā na liyā

azal se hai vahī be-kaif raushnī ab tak

guloñ kā rañg sitāroñ ne kyuuñ uḌā na liyā

jo thā aziiz usī se gurez karte rahe

galī galī meñ phire apnā rāsta na liyā

umiid sho.ala nahīñ āftāb hai 'shahzād'

charāġh thā to havāoñ ne kyuuñ bujhā na liyā

dil-e-fasurda use kyun gale laga na liya

qarib rah ke bhi jis ne tera pata na liya

bas ek lamhe mein kya kuchh guzar gai dil par

bahaal hote hue hum ne ek zamana liya

kisi bhi haal mein pahunche to hain kinare par

yahi bahut hai ki ehsan-e-naKHuda na liya

KHayal aaya rawana hue safar ke liye

na hum ne raKHt hi bandha na aab-o-dana liya

main ji raha hun magar yaad-e-raftagan ki tarah

mujhe gae hue lamhon ne kyun bula na liya

tamam umr hawa phankte hue guzri

rahe zamin pe magar KHak ka maza na liya

azal se hai wahi be-kaif raushni ab tak

gulon ka rang sitaron ne kyun uDa na liya

jo tha aziz usi se gurez karte rahe

gali gali mein phire apna rasta na liya

umid shoala nahin aaftab hai 'shahzad'

charagh tha to hawaon ne kyun bujha na liya