dil-e-gham-gin talabgar-e-qaza-e-na-gahan kyon ho

dil-e-ġham-gīñ talabgār-e-qazā-e-nā-gahāñ kyoñ ho

jise ġham mil gayā vo zindagī se sargirāñ kyoñ ho

taġhāful aur jafā ke baa'd sarhad hai mohabbat kī

dil-e-shaidā tire zulm-o-sitam se bad-gumāñ kyoñ ho

mire shukr-e-jafā par muskurā.e aur farmāyā

sitam jab mehrbānī hai to koī meherbāñ kyoñ ho

mujhe hairat hai gulzār-e-jināñ kī dil-farebī par

ḳhizāñ jis ko nahīñ vo gulsitāñ phir gulsitāñ kyoñ ho

milā phūloñ ko rang-e-ātshīñ jalte nasheman se

chaman ho mo'tarif is kā to ranj-e-āshiyāñ kyoñ ho

guloñ se siikh le iḳhfā-e-rāz-e-āshiqī koī

ḳhalish kāñToñ kī jo dil meñ hai chehre se ayaañ kyoñ ho

gila kartā huuñ qismat kā to ye a.amāl kahte haiñ

tū hī jab ho adū apnā to dushman āsmāñ kyoñ ho

jise duniyā meñ sair-e-gulshan-e-kashmīr ho hāsil

vo zāhid kī tarah jāñdāda-e-bāġh-e-jināñ kyoñ ho

dil-e-gham-gin talabgar-e-qaza-e-na-gahan kyon ho

jise gham mil gaya wo zindagi se sargiran kyon ho

taghaful aur jafa ke ba'd sarhad hai mohabbat ki

dil-e-shaida tere zulm-o-sitam se bad-guman kyon ho

mere shukr-e-jafa par muskurae aur farmaya

sitam jab mehrbani hai to koi meherban kyon ho

mujhe hairat hai gulzar-e-jinan ki dil-farebi par

KHizan jis ko nahin wo gulsitan phir gulsitan kyon ho

mila phulon ko rang-e-atshin jalte nasheman se

chaman ho mo'tarif is ka to ranj-e-ashiyan kyon ho

gulon se sikh le iKHfa-e-raaz-e-ashiqi koi

KHalish kanTon ki jo dil mein hai chehre se ayan kyon ho

gila karta hun qismat ka to ye aamal kahte hain

tu hi jab ho adu apna to dushman aasman kyon ho

jise duniya mein sair-e-gulshan-e-kashmir ho hasil

wo zahid ki tarah jaandada-e-bagh-e-jinan kyon ho