dil-e-hazin ko alam mein qarar bhi to nahin

dil-e-hazīñ ko alam meñ qarār bhī to nahīñ

mizāj-e-yār pe kuchh iḳhtiyār bhī to nahīñ

abhī se dasht-navardī kī fikr kyoñ dil ko

chaman meñ aane ko fasl-e-bahār bhī to nahīñ

maiñ kaise maan luuñ apne ko jāñ-nisāroñ meñ

mirī vafā kā tumheñ e.atibār bhī to nahīñ

hamārā shukr tirī ne.amatoñ ke aage kyā

tire karam kā hai koī shumār bhī to nahīñ

rahā ye ġhuncha-e-dil nā-shagufta misl-e-ḳhizāñ

girah-kushā-e-tabī.at bahār bhī to nahīñ

tumhāre va.adoñ pe ab kis tarah yaqīn aa.e

vafā huā hai kabhī ek baar bhī to nahīñ

basar kare koī vahshī bhī dasht meñ kyūñkar

koī daraḳht yahāñ sāya-dār bhī to nahīñ

ab un kī shān-e-taġhāful kā kyā gila kiije

jab apne dil pe mujhe iḳhtiyār bhī to nahīñ

ho 'sāqib' aap ko ahl-e-vatan se shikva kyā

ki ḳhāksār ġharīb-ud-dayār bhī to nahīñ

dil-e-hazin ko alam mein qarar bhi to nahin

mizaj-e-yar pe kuchh iKHtiyar bhi to nahin

abhi se dasht-nawardi ki fikr kyon dil ko

chaman mein aane ko fasl-e-bahaar bhi to nahin

main kaise man lun apne ko jaan-nisaron mein

meri wafa ka tumhein eatibar bhi to nahin

hamara shukr teri neamaton ke aage kya

tere karam ka hai koi shumar bhi to nahin

raha ye ghuncha-e-dil na-shagufta misl-e-KHizan

girah-kusha-e-tabiat bahaar bhi to nahin

tumhaare wadon pe ab kis tarah yaqin aae

wafa hua hai kabhi ek bar bhi to nahin

basar kare koi wahshi bhi dasht mein kyunkar

koi daraKHt yahan saya-dar bhi to nahin

ab un ki shan-e-taghaful ka kya gila kije

jab apne dil pe mujhe iKHtiyar bhi to nahin

ho 'saqib' aap ko ahl-e-watan se shikwa kya

ki KHaksar gharib-ud-dayar bhi to nahin