dil-e-hazin pe chaman ki faza ne tanz kiya

dil-e-hazīñ pe chaman kī fazā ne tanz kiyā

mazāq uḌāyā guloñ ne sabā ne tanz kiyā

paḌā jo vaqt kiyā sharmsār sajdoñ ne

uThā.e haath to mujh par du'ā ne tanz kiyā

shikast-e-zīst pe thī hausloñ kī ḳhanda-zanī

gumān-e-hastī huā to qazā ne tanz kiyā

libās hote hue bhī chhupī na 'uryānī

khilā jo phuul to chāk-e-qabā ne tanz kiyā

nahīñ ye zulm mile sab se zaḳhm-e-rusvā.ī

sitam to ye hai ki dard-āshnā ne tanz kiyā

'ajab ġhurūr-pasandī hai us kī fitrat meñ

jahāñ charāġh jalāyā havā ne tanz kiyā

the zarre zarre meñ raushan hazār ā.īne

har aa.ine pe tire naqsh-e-pā ne tanz kiyā

ye sāniha bhī qayāmat se kam nahīñ hai 'zafar'

ki mujh pe merī shikast-e-anā ne tanz kiyā

dil-e-hazin pe chaman ki faza ne tanz kiya

mazaq uDaya gulon ne saba ne tanz kiya

paDa jo waqt kiya sharmsar sajdon ne

uThae hath to mujh par du'a ne tanz kiya

shikast-e-zist pe thi hauslon ki KHanda-zani

guman-e-hasti hua to qaza ne tanz kiya

libas hote hue bhi chhupi na 'uryani

khila jo phul to chaak-e-qaba ne tanz kiya

nahin ye zulm mile sab se zaKHm-e-ruswai

sitam to ye hai ki dard-ashna ne tanz kiya

'ajab ghurur-pasandi hai us ki fitrat mein

jahan charagh jalaya hawa ne tanz kiya

the zarre zarre mein raushan hazar aaine

har aaine pe tere naqsh-e-pa ne tanz kiya

ye saniha bhi qayamat se kam nahin hai 'zafar'

ki mujh pe meri shikast-e-ana ne tanz kiya