dil-e-majruh jab bhi ek nai karwaT badalta hai

dil-e-majrūh jab bhī ik na.ī karvaT badaltā hai

gul-e-har-zaḳhm se hañstā huā nashtar nikaltā hai

huā hai aur na hogā sard dast-e-jaur gulchīñ se

sharār-e-dil jo mauj-e-rañg-o-bū ban kar uchhaltā hai

yahāñ kuchh kam nahīñ dīvāngī se hosh kā da.avā

udhar sīna-sipar huuñ maiñ jidhar se tiir chaltā hai

maiñ vo ḳhāmosh bastī huuñ umīdoñ ke samundar meñ

ki jis kī ḳhāmushī kī tah meñ ik tūfān paltā hai

muqaddar ke likhe par mutma.in hone ko ho jā.ūñ

magar ye dard rah rah kar jo pahlū meñ machaltā hai

'salām' ik din pahuñch hī jā.eñge un ke bhī dāman tak

ye sho.ale jin kī garmī se mirā añg añg jaltā hai

dil-e-majruh jab bhi ek nai karwaT badalta hai

gul-e-har-zaKHm se hansta hua nashtar nikalta hai

hua hai aur na hoga sard dast-e-jaur gulchin se

sharar-e-dil jo mauj-e-rang-o-bu ban kar uchhalta hai

yahan kuchh kam nahin diwangi se hosh ka dawa

udhar sina-sipar hun main jidhar se tir chalta hai

main wo KHamosh basti hun umidon ke samundar mein

ki jis ki KHamushi ki tah mein ek tufan palta hai

muqaddar ke likhe par mutmain hone ko ho jaun

magar ye dard rah rah kar jo pahlu mein machalta hai

'salam' ek din pahunch hi jaenge un ke bhi daman tak

ye shoale jin ki garmi se mera ang ang jalta hai