dil-e-muztar ko hum kuchh is tarah samjhae jate hain

dil-e-muztar ko ham kuchh is tarah samjhā.e jaate haiñ

ki vo bas aa rahe haiñ aa hī pahuñche aa.e jaate haiñ

nigāh-e-shauq ke parvarda nazzāroñ kī mahfil meñ

ye dil bahle na bahle haañ magar bahlā.e jaate haiñ

ba-zāhir to bahut nāzuk haiñ dil ahl-e-mohabbat ke

yahī shīshe kabhī patthar se bhī Takrā.e jaate haiñ

hañsā karte the sun kar dāstān-e-qais bachpan meñ

javāñ ho kar isī qissa ko ham dohrā.e jaate haiñ

vo duzdīda nigāheñ hoñ ki ḳhanjar-āzmā abrū

mohabbat kī har ik manzil pe rahzan paa.e jaate haiñ

bharī mahfil meñ sab se haiñ muḳhātab be-hijābāna

magar bas ek ham haiñ jin se vo sharmā.e jaate haiñ

ḳhayāl-e-ujrat-e-mauhūm par 'iqbāl' duniyā meñ

ye ham se zindagī ke bojh kyuuñ uThvā.e jaate haiñ

dil-e-muztar ko hum kuchh is tarah samjhae jate hain

ki wo bas aa rahe hain aa hi pahunche aae jate hain

nigah-e-shauq ke parwarda nazzaron ki mahfil mein

ye dil bahle na bahle han magar bahlae jate hain

ba-zahir to bahut nazuk hain dil ahl-e-mohabbat ke

yahi shishe kabhi patthar se bhi Takrae jate hain

hansa karte the sun kar dastan-e-qais bachpan mein

jawan ho kar isi qissa ko hum dohrae jate hain

wo duzdida nigahen hon ki KHanjar-azma abru

mohabbat ki har ek manzil pe rahzan pae jate hain

bhari mahfil mein sab se hain muKHatab be-hijabana

magar bas ek hum hain jin se wo sharmae jate hain

KHayal-e-ujrat-e-mauhum par 'iqbaal' duniya mein

ye hum se zindagi ke bojh kyun uThwae jate hain