dil-e-muztar pe ab unki inayat hoti jati hai

dil-e-muztar pe ab un kī 'ināyat hotī jaatī hai

kabhī thī jis se nafrat us se ulfat hotī jaatī hai

zamāna ho gayā tark-e-mohabbat ko magar ab bhī

kisī kī yaad taskīn-e-tabī’at hotī jaatī hai

vo merī 'arz-e-ġham par aaj kuchh sharmā.e jaate haiñ

unheñ apnī jafāoñ par nadāmat hotī jaatī hai

tumhāre ruuTh jaane se maiñ yuuñ mahsūs kartā huuñ

zamāne bhar ko jaise mujh se nafrat hotī jaatī hai

vo pahlī barhamī ab nāla-e-ġham par nahīñ hotī

ġhurūr-e-husn ko zāhir haqīqat hotī jaatī hai

maiñ apnī avvalīñ laġhzish na bhūlā huuñ na bhūlūñgā

usī kī yaad se mujh ko nadāmat hotī jaatī hai

mire is jazba-e-sādiq kī kuchh to qadr kar zālim

tirī begāngī mujh par qayāmat hotī jaatī hai

koī ai fikr is dīvāngī kī daad kyā degā

shikāyat kartā jaatā huuñ nadāmat hotī jaatī hai

dil-e-muztar pe ab un ki 'inayat hoti jati hai

kabhi thi jis se nafrat us se ulfat hoti jati hai

zamana ho gaya tark-e-mohabbat ko magar ab bhi

kisi ki yaad taskin-e-tabi’at hoti jati hai

wo meri 'arz-e-gham par aaj kuchh sharmae jate hain

unhen apni jafaon par nadamat hoti jati hai

tumhaare ruTh jaane se main yun mahsus karta hun

zamane bhar ko jaise mujh se nafrat hoti jati hai

wo pahli barhami ab nala-e-gham par nahin hoti

ghurur-e-husn ko zahir haqiqat hoti jati hai

main apni awwalin laghzish na bhula hun na bhulunga

usi ki yaad se mujh ko nadamat hoti jati hai

mere is jazba-e-sadiq ki kuchh to qadr kar zalim

teri begangi mujh par qayamat hoti jati hai

koi ai fikr is diwangi ki dad kya dega

shikayat karta jata hun nadamat hoti jati hai