dil-e-muztarib teri dhaDkanon mein ye kis ka aks-e-KHiram hai

dil-e-muztarib tirī dhaḌkanoñ meñ ye kis kā aks-e-ḳhirām hai

ki isī ḳhirām pe munhasir mirī zindagī kā nizām hai

isī kashmakash meñ na tai hue ruḳh-o-zulf-e-yār ke marhale

ki harīf-e-dīda-e-muntazir kabhī sub.h hai kabhī shaam hai

mire haal par nigah-e-karam to bajā magar ye karam kahīñ

mirā iztirāb na chhīn le abhī is se aur bhī kaam hai

mah-o-mehr-o-anjum-o-kahkashāñ nahīñ laakh parda-e-darmiyāñ

vo had-e-nigāh se duur hai to jabīñ se ek hī gaam hai

jo 'azīz' hai mirī zindagī to ye mahviyat bhī hai bandagī

ki namāz-e-ishq meñ nāsehā na sujūd hai na salām hai

dil-e-muztarib teri dhaDkanon mein ye kis ka aks-e-KHiram hai

ki isi KHiram pe munhasir meri zindagi ka nizam hai

isi kashmakash mein na tai hue ruKH-o-zulf-e-yar ke marhale

ki harif-e-dida-e-muntazir kabhi subh hai kabhi sham hai

mere haal par nigah-e-karam to baja magar ye karam kahin

mera iztirab na chhin le abhi is se aur bhi kaam hai

mah-o-mehr-o-anjum-o-kahkashan nahin lakh parda-e-darmiyan

wo had-e-nigah se dur hai to jabin se ek hi gam hai

jo 'aziz' hai meri zindagi to ye mahwiyat bhi hai bandagi

ki namaz-e-ishq mein naseha na sujud hai na salam hai