dil-e-nadan ye ulfat ka safar hai

dil-e-nādāñ ye ulfat kā safar hai

yahāñ manzil nahīñ bas rahguzar hai

guloñ se baaġh meñ kahtī hai shabnam

bahār-e-zindagī nā-mo'tabar hai

bashar kī zindagī hai ik alāmat

haqīqat meñ ye duniyā kā safar hai

adā-e-kam-nigāhī chhoḌ saaqī

shu.ūr-e-mai-parastāñ josh par hai

ḳhushī par ranj ko tarjīh degā

kisī insān meñ ġhairat agar hai

chaḌhā letā hai jo chehre pe chehra

vahī is daur meñ ahl-e-hunar hai

ḳhabar jis ko nahīñ rahtī hai apnī

vahī terī ḳhabar se bā-ḳhabar hai

'la.īq' itnā to tum bhī jānte ho

zamāne meñ kise kal kī ḳhabar hai

dil-e-nadan ye ulfat ka safar hai

yahan manzil nahin bas rahguzar hai

gulon se bagh mein kahti hai shabnam

bahaar-e-zindagi na-mo'tabar hai

bashar ki zindagi hai ek alamat

haqiqat mein ye duniya ka safar hai

ada-e-kam-nigahi chhoD saqi

shuur-e-mai-parastan josh par hai

KHushi par ranj ko tarjih dega

kisi insan mein ghairat agar hai

chaDha leta hai jo chehre pe chehra

wahi is daur mein ahl-e-hunar hai

KHabar jis ko nahin rahti hai apni

wahi teri KHabar se ba-KHabar hai

'laiq' itna to tum bhi jaante ho

zamane mein kise kal ki KHabar hai