dil-e-nalan teri aahon mein asar hai ki nahin

dil-e-nālāñ tirī aahoñ meñ asar hai ki nahīñ

be-qarārī jo idhar hai vo udhar hai ki nahīñ

sho.ala-e-ishq jigar tak to bhaḌak uTThā hai

kuchh ḳhabar bhī tujhe ai dīda-e-tar hai ki nahīñ

ham batā.eñ tumheñ is shoḳh ke parda kā sabab

dekhnā ye hai tumheñ tāb-e-nazar hai ki nahīñ

qais ye chāk-garebāñ to hai vahshat kī dalīl

chāk-dil hai ki nahīñ chāk-jigar hai ki nahīñ

us kī sūrat se huuñ sannā-e-azal kā qaa.il

jalva-e-qudrat-e-haq husn-e-bashar hai ki nahīñ

ka.aba-e-dil pe mire roz chaḌhā.ī kaisī

ai buto kuchh tumheñ allāh kā Dar hai ki nahīñ

lan-tarānī ko zarā ġhaur se samjho muusā

jalva-e-hashr tumheñ madd-e-nazar hai ki nahīñ

dair meñ DhūñDhtā huuñ ka.aba-nashīñ ko zāhid

vahī jalva jo udhar hai vo idhar hai ki nahīñ

qatl-e-āshiq to tirī aañkh kā jaada Thahrā

lab-e-īsā kā tire lab meñ asar hai ki nahīñ

mere phūloñ se bhī dāman ko bachāyā tum ne

is taġhāful kī bhī kuchh tum ko ḳhabar hai ki nahīñ

sham.a kī nazr idhar jaan patañgoñ kī huī

vaqf-e-gul-gīr idhar sham.a kā sar hai ki nahīñ

shab ko barse the mire dīda-e-tar tham tham kar

sub.h ko dekhiye to ġhair kā ghar hai ki nahīñ

haath ḳhālī na dikhāo pa.e qatl-e-dushman

teġh bhuul aa.e to kyā teġh-e-nazar hai ki nahīñ

dam to lene do nakīrain thakā-māñda huuñ

ruḳh pe dekho to mire gard-e-safar hai ki nahīñ

nāla-e-dil to mirā shor-e-qayāmat hai magar

nāzukī terī mujhe madd-e-nazar hai ki nahīñ

ġhuncha-e-dil se shab-e-ġham ye sadā aatī thī

maiñ huuñ pazhmurda kahīñ bād-e-sahar hai ki nahīñ

ātishīñ aah kā hai sañg-diloñ par bhī asar

toḌ kar dekh lo patthar meñ sharar hai ki nahīñ

tuur kī aag to bujhte hī bujhegī yārab

tālib-e-dīd ko apnī bhī ḳhabar hai ki nahīñ

sab se aage hai gunahgāroñ kī saf mahshar meñ

qābil-e-nāz mirā dāman-e-tar hai ki nahīñ

ham ne 'rāsiḳh' tujhe mahfil meñ bahut yaad kiyā

us ne pūchhā thā koī tufta-jigar hai ki nahīñ

dil-e-nalan teri aahon mein asar hai ki nahin

be-qarari jo idhar hai wo udhar hai ki nahin

shoala-e-ishq jigar tak to bhaDak uTTha hai

kuchh KHabar bhi tujhe ai dida-e-tar hai ki nahin

hum bataen tumhein is shoKH ke parda ka sabab

dekhna ye hai tumhein tab-e-nazar hai ki nahin

qais ye chaak-gareban to hai wahshat ki dalil

chaak-dil hai ki nahin chaak-jigar hai ki nahin

us ki surat se hun sanna-e-azal ka qail

jalwa-e-qudrat-e-haq husn-e-bashar hai ki nahin

kaba-e-dil pe mere roz chaDhai kaisi

ai buto kuchh tumhein allah ka Dar hai ki nahin

lan-tarani ko zara ghaur se samjho musa

jalwa-e-hashr tumhein madd-e-nazar hai ki nahin

dair mein DhunDhta hun kaba-nashin ko zahid

wahi jalwa jo udhar hai wo idhar hai ki nahin

qatl-e-ashiq to teri aankh ka jada Thahra

lab-e-isa ka tere lab mein asar hai ki nahin

mere phulon se bhi daman ko bachaya tum ne

is taghaful ki bhi kuchh tum ko KHabar hai ki nahin

shama ki nazr idhar jaan patangon ki hui

waqf-e-gul-gir idhar shama ka sar hai ki nahin

shab ko barse the mere dida-e-tar tham tham kar

subh ko dekhiye to ghair ka ghar hai ki nahin

hath KHali na dikhao pae qatl-e-dushman

tegh bhul aae to kya tegh-e-nazar hai ki nahin

dam to lene do nakirain thaka-manda hun

ruKH pe dekho to mere gard-e-safar hai ki nahin

nala-e-dil to mera shor-e-qayamat hai magar

nazuki teri mujhe madd-e-nazar hai ki nahin

ghuncha-e-dil se shab-e-gham ye sada aati thi

main hun pazhmurda kahin baad-e-sahar hai ki nahin

aatishin aah ka hai sang-dilon par bhi asar

toD kar dekh lo patthar mein sharar hai ki nahin

tur ki aag to bujhte hi bujhegi yarab

talib-e-did ko apni bhi KHabar hai ki nahin

sab se aage hai gunahgaron ki saf mahshar mein

qabil-e-naz mera daman-e-tar hai ki nahin

hum ne 'rasiKH' tujhe mahfil mein bahut yaad kiya

us ne puchha tha koi tufta-jigar hai ki nahin