dil-e-shorida bata teri ye aadat kya hai

dil-e-shorīda batā terī ye aadat kyā hai

ham se hī pūchh rahā hai ki mohabbat kyā hai

na mohabbat na muravvat na mulāqāt rahī

gar yahī dostī Thahrī to adāvat kyā hai

ham na kahte the ki yādoñ ko sambhāle rakhnā

ab jo tanhā.ī kā aalam hai to hairat kyā hai

ġhair ko saath liye aa.e ho ham se milne

fitna-añgezī ye kaisī ye qayāmat kyā hai

zulf zanjīr-e-sitam teġh-e-jafā haiñ abrū

dil-e-vahshat-zada ab bachne kī sūrat kyā hai

kaisī be-mehrī se ruḳhsat huā vo toḌ ke dil

pūchh to letā tirī āḳhirī hasrat kyā hai

kis liye zinda huuñ maiñ us se bichhaḌ ke 'mushtāq'

mujh se pūchho ki mire dil meñ nadāmat kyā hai

dil-e-shorida bata teri ye aadat kya hai

hum se hi puchh raha hai ki mohabbat kya hai

na mohabbat na murawwat na mulaqat rahi

gar yahi dosti Thahri to adawat kya hai

hum na kahte the ki yaadon ko sambhaale rakhna

ab jo tanhai ka aalam hai to hairat kya hai

ghair ko sath liye aae ho hum se milne

fitna-angezi ye kaisi ye qayamat kya hai

zulf zanjir-e-sitam tegh-e-jafa hain abru

dil-e-wahshat-zada ab bachne ki surat kya hai

kaisi be-mehri se ruKHsat hua wo toD ke dil

puchh to leta teri aaKHiri hasrat kya hai

kis liye zinda hun main us se bichhaD ke 'mushtaq'

mujh se puchho ki mere dil mein nadamat kya hai