dil gham ke liye mazra-e-zarKHez bahut hai

dil ġham ke liye mazra'-e-zarḳhez bahut hai

aur dasht-e-junūñ hai ki ġham-añgez bahut hai

ham barg-e-ḳhizāñ-dīda koī DhūñD bhī laa.eñ

lekin ye zamāne kī havā tez bahut hai

pāband-e-vafā hai ki chhalakne se hai maane

paimāna-e-jāñ varna to labrez bahut hai

kyā tarz-e-takallum se hameñ us ke sarokār

andāz-e-taḳhātub hī dil-āvez bahut hai

is āhu-e-ram-ḳhurda se mushkil hai rah-o-rasm

vo shahr ke logoñ meñ kam-āmez bahut hai

ai sub.h sitāroñ kī tajallī meñ nazar aa

hangām-e-shabāb ab to sahar-ḳhez bahut hai

kuchh ham bhī 'kafīl' aise takalluf se gurezāñ

kuchh un ko bhī yuuñ ādat-e-parhez bahut hai

dil gham ke liye mazra'-e-zarKHez bahut hai

aur dasht-e-junun hai ki gham-angez bahut hai

hum barg-e-KHizan-dida koi DhunD bhi laen

lekin ye zamane ki hawa tez bahut hai

paband-e-wafa hai ki chhalakne se hai mane

paimana-e-jaan warna to labrez bahut hai

kya tarz-e-takallum se hamein us ke sarokar

andaz-e-taKHatub hi dil-awez bahut hai

is aahu-e-ram-KHurda se mushkil hai rah-o-rasm

wo shahr ke logon mein kam-amez bahut hai

ai subh sitaron ki tajalli mein nazar aa

hangam-e-shabab ab to sahar-KHez bahut hai

kuchh hum bhi 'kafil' aise takalluf se gurezan

kuchh un ko bhi yun aadat-e-parhez bahut hai