dil hai harif partaw-e-husn-e-shabab ka

dil hai harīf partav-e-husn-e-shabāb kā

zarra banā huā hai javāb āftāb kā

phir zikr aa gayā hai azāb-o-savāb kā

laanā uThā ke vo mirā sāġhar sharāb kā

har vahm be-sabāt hai har mudda.ā ḳhayāl

ya.anī ye zindagī nahīñ aalam hai ḳhvāb kā

muusā samajh rahe the tajallī kī jis ko mauj

gosha sarak gayā thā kisī kī naqāb kā

vo haiñ ki chaak kar bhī chuke arz-e-shauq ko

maiñ huuñ ki muntazir huuñ abhī tak javāb kā

'maḳhmūr' koī bhī nazar aatā nahīñ hasīñ

allah re hausla nigah-e-bāryāb kā

dil hai harif partaw-e-husn-e-shabab ka

zarra bana hua hai jawab aaftab ka

phir zikr aa gaya hai azab-o-sawab ka

lana uTha ke wo mera saghar sharab ka

har wahm be-sabaat hai har muddaa KHayal

yani ye zindagi nahin aalam hai KHwab ka

musa samajh rahe the tajalli ki jis ko mauj

gosha sarak gaya tha kisi ki naqab ka

wo hain ki chaak kar bhi chuke arz-e-shauq ko

main hun ki muntazir hun abhi tak jawab ka

'maKHmur' koi bhi nazar aata nahin hasin

allah re hausla nigah-e-baryab ka