dil hai kisi ki zulf-e-shikan-dar-shikan mein kya

dil hai kisī kī zulf-e-shikan-dar-shikan meñ kyā

'akbar' ulajh rahe ho tum ab har suḳhan meñ kyā

sābit huā ye shahr-e-ḳhamoshāñ kī sair se

aatī hai niiñd chain se apne vatan meñ kyā

ġhurbat meñ us taraf kī na aa.ī kabhī havā

bū-e-vafā bhī ab nahīñ ahl-e-vatan meñ kyā

jo raushnī hai is meñ vo rūh-e-ravāñ kī hai

jab ye nahīñ to phir hai añdhere badan meñ kyā

bū ho ke kū-e-yār meñ jā pahuñchī merī na.ash

kyā jaane DhūñDhte haiñ farishte kafan meñ kyā

kyoñ chūmte haiñ us ko nakīrain bār-bār

naam us kā hai likhā huā mere kafan meñ kyā

poshāk jald laao ki ham ġhusl kar chuke

ahbāb kar rahe haiñ takalluf kafan meñ kyā

miTTī ke itr se hai basāyā mirā libās

ab is se baḌh ke hogā takalluf kafan meñ kyā

dil hai kisi ki zulf-e-shikan-dar-shikan mein kya

'akbar' ulajh rahe ho tum ab har suKHan mein kya

sabit hua ye shahr-e-KHamoshan ki sair se

aati hai nind chain se apne watan mein kya

ghurbat mein us taraf ki na aai kabhi hawa

bu-e-wafa bhi ab nahin ahl-e-watan mein kya

jo raushni hai is mein wo ruh-e-rawan ki hai

jab ye nahin to phir hai andhere badan mein kya

bu ho ke ku-e-yar mein ja pahunchi meri nash

kya jaane DhunDhte hain farishte kafan mein kya

kyon chumte hain us ko nakirain bar-bar

nam us ka hai likha hua mere kafan mein kya

poshak jald lao ki hum ghusl kar chuke

ahbab kar rahe hain takalluf kafan mein kya

miTTi ke itr se hai basaya mera libas

ab is se baDh ke hoga takalluf kafan mein kya