dil hai kyon itna pareshan mujhe malum nahin

dil hai kyoñ itnā pareshāñ mujhe mālūm nahīñ

kaun hai silsila-jumbāñ mujhe mālūm nahīñ

ab ye allāh hī jaane vo ḳhizāñ thī ki bahār

kab huā chaak garebāñ mujhe mālūm nahīñ

mujh ko mālūm hai har dard kā darmāñ lekin

apne hī dard kā darmāñ mujhe mālūm nahīñ

muskurātā huuñ musībat meñ ye aadat hai mirī

zabt mushkil hai ki āsāñ mujhe mālūm nahīñ

phuul ban jaane ko yā nazr-e-ḳhizāñ hone ko

kis liye khiltī haiñ kaliyāñ mujhe mālūm nahīñ

un kī marzī ho to ik aah se āġhāz karūñ

abhī afsāne kā unvāñ mujhe mālūm nahīñ

yuuñ nasheman meñ huuñ jis tarah qafas meñ ho koī

abhī ā.īn-e-gulistāñ mujhe mālūm nahīñ

jāntā huuñ mire dil meñ bhī kuchh armāñ haiñ 'sa.īd'

kaise bar aate haiñ armāñ mujhe mālūm nahīñ

dil hai kyon itna pareshan mujhe malum nahin

kaun hai silsila-jumban mujhe malum nahin

ab ye allah hi jaane wo KHizan thi ki bahaar

kab hua chaak gareban mujhe malum nahin

mujh ko malum hai har dard ka darman lekin

apne hi dard ka darman mujhe malum nahin

muskuraata hun musibat mein ye aadat hai meri

zabt mushkil hai ki aasan mujhe malum nahin

phul ban jaane ko ya nazr-e-KHizan hone ko

kis liye khilti hain kaliyan mujhe malum nahin

un ki marzi ho to ek aah se aaghaz karun

abhi afsane ka unwan mujhe malum nahin

yun nasheman mein hun jis tarah qafas mein ho koi

abhi aain-e-gulistan mujhe malum nahin

jaanta hun mere dil mein bhi kuchh arman hain 'said'

kaise bar aate hain arman mujhe malum nahin