dil hai palkon mein simaT aata hai aansu ki tarah

dil hai palkoñ meñ simaT aatā hai aañsū kī tarah

reshmī raat kī bhīgī huī ḳhushbū kī tarah

zindagī aaj hai yādoñ ke ta.āqub meñ ravāñ

ret ke Tīloñ pe gard-e-ram-e-āhū kī tarah

aan kī aan meñ tārīḳh badal jaatī hai

shikan-e-zulf kī sūrat ḳham-e-abru kī tarah

taulne ke liye phūloñ kī tarāzū bhī to ho

fikr o ehsās bhī tul jaate haiñ ḳhushbū kī tarah

shahr-e-afsos meñ apne haiñ na begāne haiñ

ab dil o jaañ ke bhī rishte haiñ man-o-tū kī tarah

bijliyāñ haiñ ki chamaktī haiñ rag-e-jāñ ke qarīb

jām-e-sahbā kī tarah halqa-e-gesū kī tarah

terī yādoñ kī kahānī to nahīñ hai 'tanvīr'

dil pe dastak jo diyā kartā hai ḳhushbū kī tarah

dil hai palkon mein simaT aata hai aansu ki tarah

reshmi raat ki bhigi hui KHushbu ki tarah

zindagi aaj hai yaadon ke taaqub mein rawan

ret ke Tilon pe gard-e-ram-e-ahu ki tarah

aan ki aan mein tariKH badal jati hai

shikan-e-zulf ki surat KHam-e-abru ki tarah

taulne ke liye phulon ki taraazu bhi to ho

fikr o ehsas bhi tul jate hain KHushbu ki tarah

shahr-e-afsos mein apne hain na begane hain

ab dil o jaan ke bhi rishte hain man-o-tu ki tarah

bijliyan hain ki chamakti hain rag-e-jaan ke qarib

jam-e-sahba ki tarah halqa-e-gesu ki tarah

teri yaadon ki kahani to nahin hai 'tanwir'

dil pe dastak jo diya karta hai KHushbu ki tarah