dil hai to tere wasl ke arman bahut hain

dil hai to tire vasl ke armān bahut haiñ

ye ghar jo salāmat hai to mehmān bahut hai

maiñ daad kā ḳhvāhāñ nahīñ ai dāvar-e-mahshar

aaj apne kiye par vo pashemān bahut haiñ

dil le ke khilaune kī tarah toḌ na Dāleñ

Dar mujh ko yahī hai ki vo nādān bahut haiñ

vo phuul chaḌhāte haiñ dabī jaatī hai turbat

ma.ashūq ke thoḌe se bhī ehsān bahut haiñ

tum ko na pasand aa.e na lo pher do mujh ko

is dil ke ḳharīdār mirī jaan bahut haiñ

DāñTā kabhī ġhamze ne kabhī naaz ne Tokā

ḳhalvat meñ bhī saath un ke nigahbān bahut haiñ

ḳhālī bhī koī dil hai vahāñ ishq-e-sanam se

kahne ko to ka.abe meñ musalmān bahut haiñ

shāyad ye asar ho merī āh-e-saharī kā

kuchh sub.h se vo aaj pareshān bahut haiñ

kyā shab ko 'hafīz' un se yahīñ vasl kī Thahrī

aaj aap ke ghar aish ke sāmān bahut haiñ

dil hai to tere wasl ke arman bahut hain

ye ghar jo salamat hai to mehman bahut hai

main dad ka KHwahan nahin ai dawar-e-mahshar

aaj apne kiye par wo pasheman bahut hain

dil le ke khilaune ki tarah toD na Dalen

Dar mujh ko yahi hai ki wo nadan bahut hain

wo phul chaDhate hain dabi jati hai turbat

mashuq ke thoDe se bhi ehsan bahut hain

tum ko na pasand aae na lo pher do mujh ko

is dil ke KHaridar meri jaan bahut hain

DanTa kabhi ghamze ne kabhi naz ne Toka

KHalwat mein bhi sath un ke nigahban bahut hain

KHali bhi koi dil hai wahan ishq-e-sanam se

kahne ko to kabe mein musalman bahut hain

shayad ye asar ho meri aah-e-sahari ka

kuchh subh se wo aaj pareshan bahut hain

kya shab ko 'hafiz' un se yahin wasl ki Thahri

aaj aap ke ghar aish ke saman bahut hain