dil hi ada kare to kare dil ke wajibaat

dil hī adā kare to kare dil ke vājibāt

āñkhoñ se tai na hoñge diloñ ke muāmlāt

mahrūmiyoñ ne dil kī tamannā.eñ chhīn liiñ

bachchoñ ne karne chhoḌ diye haiñ mutālibāt

go zindagī guzār rahe haiñ sabhī magar

hāsil kisī-kisī ko haiñ is ke lavāzimāt

logoñ ne apnī zaat se mansūb kar liye

maiñ ne raqam kiye the faqat apne vāqi.āt

bār-e-ġham-e-hayāt vahī kā vahī rahā

ham ne ghaTā ke dekh liiñ apnī zarūriyāt

āñkhoñ ke rāste kabhī mahmūd ban ke aa

muddat se muntazir hai mire dil kā somnāt

logo tumhāre husn-e-muravvat ko kyā huā

mīzān-e-zar meñ taul rahe ho ta.alluqāt

anjām ek sā hai vo 'nusrat' ho yā ki 'mīr'

zarre ko hai sabāt na ḳhurshīd ko sabāt

dil hi ada kare to kare dil ke wajibaat

aankhon se tai na honge dilon ke muamlat

mahrumiyon ne dil ki tamannaen chhin lin

bachchon ne karne chhoD diye hain mutalibaat

go zindagi guzar rahe hain sabhi magar

hasil kisi-kisi ko hain is ke lawazimat

logon ne apni zat se mansub kar liye

main ne raqam kiye the faqat apne waqiat

bar-e-gham-e-hayat wahi ka wahi raha

hum ne ghaTa ke dekh lin apni zaruriyat

aankhon ke raste kabhi mahmud ban ke aa

muddat se muntazir hai mere dil ka somnat

logo tumhaare husn-e-murawwat ko kya hua

mizan-e-zar mein taul rahe ho talluqat

anjam ek sa hai wo 'nusrat' ho ya ki 'mir'

zarre ko hai sabaat na KHurshid ko sabaat