dil hi tha bas mein na wo rashk-e-qamar aaj ki raat

dil hī thā bas meñ na vo rashk-e-qamar aaj kī raat

kuchh ajab Dhang se kī ham ne sahar aaj kī raat

va.ada-e-vasl se bhī kal to tasallī dil ko

aaj inkār hai kyūñ-kar ho basar aaj kī raat

tere bīmār ko har roz ta.ab thā lekin

us ke muñh par hai ayaañ rang-e-digar aaj kī raat

rāhat-e-ḳhvāb nahīñ hai jo ham-āġhoshī meñ

siine par shauq se rakh lījiye sar aaj kī raat

ro.uuñ kyā chashm ko ham-sā.e mujhe rote haiñ

sail-e-girya ne na chhoḌā koī ghar aaj kī raat

naqd-e-dil nazr karūñ māya-e-jāñ bhī de duuñ

un ke aane kī jo de koī ḳhabar aaj kī raat

un ke aane meñ na ho jaa.e kahīñ ye bhī uzr

tham ke ro ek zarā dīda-e-tar aaj kī raat

dekh luuñ sub.h ko kyā hotī hai dil ko rāhat

mujh ko jiine de tū ai soz-e-jigar aaj kī raat

ham na kahte the 'zakī' ishq na kiijo nādāñ

hai vahī hijr-e-sanam pesh-e-nazar aaj kī raat

dil hi tha bas mein na wo rashk-e-qamar aaj ki raat

kuchh ajab Dhang se ki hum ne sahar aaj ki raat

wada-e-wasl se bhi kal to tasalli dil ko

aaj inkar hai kyun-kar ho basar aaj ki raat

tere bimar ko har roz tab tha lekin

us ke munh par hai ayan rang-e-digar aaj ki raat

rahat-e-KHwab nahin hai jo ham-aghoshi mein

sine par shauq se rakh lijiye sar aaj ki raat

roun kya chashm ko ham-sae mujhe rote hain

sail-e-girya ne na chhoDa koi ghar aaj ki raat

naqd-e-dil nazr karun maya-e-jaan bhi de dun

un ke aane ki jo de koi KHabar aaj ki raat

un ke aane mein na ho jae kahin ye bhi uzr

tham ke ro ek zara dida-e-tar aaj ki raat

dekh lun subh ko kya hoti hai dil ko rahat

mujh ko jine de tu ai soz-e-jigar aaj ki raat

hum na kahte the 'zaki' ishq na kijo nadan

hai wahi hijr-e-sanam pesh-e-nazar aaj ki raat