dil ho thakan se chur sahaara kahin na ho

dil ho thakan se chuur sahārā kahīñ na ho

bhaTkeñ to duur duur ishāra kahīñ na ho

rū-e-zamīñ pe ho na shaboñ ko koī charāġh

dast-e-falak pe koī sitāra kahīñ na ho

khultā na ho ki kis ne bulāyā hameñ yahāñ

bas anjuman ho anjuman-ārā kahīñ na ho

vus'at bhī ek chiiz hai ye bhī burī nahīñ

lekin na is qadar ki kināra kahīñ na ho

chashmak sī barq kī hai guzartā huā ḳhayāl

ik baar har kahīñ ho dubāra kahīñ na ho

ab tum kahīñ milo to kareñ mil ke us ko yaad

jo vaqt ham ne saath guzārā kahīñ na ho

'ḳhurshīd' mere dil ko sunā apnā dard-e-dil

tū ne agar ye bojh utārā kahīñ na ho

dil ho thakan se chur sahaara kahin na ho

bhaTken to dur dur ishaara kahin na ho

ru-e-zamin pe ho na shabon ko koi charagh

dast-e-falak pe koi sitara kahin na ho

khulta na ho ki kis ne bulaya hamein yahan

bas anjuman ho anjuman-ara kahin na ho

wus'at bhi ek chiz hai ye bhi buri nahin

lekin na is qadar ki kinara kahin na ho

chashmak si barq ki hai guzarta hua KHayal

ek bar har kahin ho dubara kahin na ho

ab tum kahin milo to karen mil ke us ko yaad

jo waqt hum ne sath guzara kahin na ho

'KHurshid' mere dil ko suna apna dard-e-dil

tu ne agar ye bojh utara kahin na ho