dil hote hote manzil-e-jaanana ho gaya

dil hote hote manzil-e-jānāna ho gayā

ābād rafta rafta ye vīrāna ho gayā

vo haiñ ki do-jahān ko apnā.e jaate haiñ

maiñ huuñ ki apnī zaat se begāna ho gayā

jalne kā shauq uf tire kushte kī ḳhaak kā

jo zarra uḌ gayā vahī parvāna ho gayā

terī tajalliyoñ ne vo badlī haiñ sūrateñ

merā ḳhayāl ek parī-ḳhāna ho gayā

vo raah rāh-e-ishq hai jis meñ ki rah-navard

dīvāna jo huā vahī farzāna ho gayā

mastī kī laġhzishoñ ko thā ehsās-e-bandagī

girnā hī merā sajda-e-shukrāna ho gayā

saaqī kī aañkh meñ vo balā kī sharāb thī

bad-mast ik nigāh meñ mai-ḳhāna ho gayā

begānagī meñ shaad huuñ maiñ is ḳhayāl se

terā vahī hai sab se jo begāna ho gayā

bazm-e-qadah ko dekh ke ḳhud-ġharziyoñ se paak

'nāmī' sharīk-e-maslak-e-rindāna ho gayā

dil hote hote manzil-e-jaanana ho gaya

aabaad rafta rafta ye virana ho gaya

wo hain ki do-jahan ko apnae jate hain

main hun ki apni zat se begana ho gaya

jalne ka shauq uf tere kushte ki KHak ka

jo zarra uD gaya wahi parwana ho gaya

teri tajalliyon ne wo badli hain suraten

mera KHayal ek pari-KHana ho gaya

wo rah rah-e-ishq hai jis mein ki rah-naward

diwana jo hua wahi farzana ho gaya

masti ki laghzishon ko tha ehsas-e-bandagi

girna hi mera sajda-e-shukrana ho gaya

saqi ki aankh mein wo bala ki sharab thi

bad-mast ek nigah mein mai-KHana ho gaya

beganagi mein shad hun main is KHayal se

tera wahi hai sab se jo begana ho gaya

bazm-e-qadah ko dekh ke KHud-gharziyon se pak

'nami' sharik-e-maslak-e-rindana ho gaya