dil ishq ka mara tha college ke zamane mein

dil ishq kā maarā thā college ke zamāne meñ

har zaḳhm gavārā thā college ke zamāne meñ

ab sirf andherī shab aur saath hai tanhā.ī

ik chāñd hamārā thā college ke zamāne meñ

hai aaj bhī yādoñ ke gumbad meñ sadā terī

kyoñ tū ne pukārā thā college ke zamāne meñ

ahbāb kī mahfil meñ ham baañT diyā karte

ġham jaise chhuārā thā college ke zamāne meñ

baiThe haiñ jahāñ aañsū is aañkh ke sāhil par

ḳhvāboñ ko utārā thā college ke zamāne meñ

us ke hī to sadqe meñ har jiit milī ham ko

jo ma.arka haarā thā college ke zamāne meñ

bosīda kitābeñ sab us phuul se mahkī haiñ

baḳhshā jo tumhārā thā college ke zamāne meñ

ḳhāmosh jazīra to sadmoñ se banā huuñ maiñ

pur-shor kinārā thā college ke zamāne meñ

likh dete 'nabīl' apne sher us kī kitāboñ par

yuuñ fan ko nikhārā thā college ke zamāne meñ

dil ishq ka mara tha college ke zamane mein

har zaKHm gawara tha college ke zamane mein

ab sirf andheri shab aur sath hai tanhai

ek chand hamara tha college ke zamane mein

hai aaj bhi yaadon ke gumbad mein sada teri

kyon tu ne pukara tha college ke zamane mein

ahbab ki mahfil mein hum banT diya karte

gham jaise chhuara tha college ke zamane mein

baiThe hain jahan aansu is aankh ke sahil par

KHwabon ko utara tha college ke zamane mein

us ke hi to sadqe mein har jit mili hum ko

jo marka haara tha college ke zamane mein

bosida kitaben sab us phul se mahki hain

baKHsha jo tumhaara tha college ke zamane mein

KHamosh jazira to sadmon se bana hun main

pur-shor kinara tha college ke zamane mein

likh dete 'nabil' apne sher us ki kitabon par

yun fan ko nikhaara tha college ke zamane mein