dil jo shaista-e-jafa na hua

dil jo shā.ista-e-jafā na huā

lazzat-e-ġham se āshnā na huā

tū kabhī paas se judā na huā

dil magar sūrat-āshnā na huā

zindagī kā maza vo kyā jaane

jis ko marne kā hausla na huā

ham ko shikva rahā judā.ī kā

aur tū paas se judā na huā

tum se kahne se fā.eda koī

ḳhair jo kuchh huā burā na huā

sochte hī rahe kahīñ na kahīñ

na huā arz-e-mudda.ā na huā

yaad karte haiñ husn-o-ishq hameñ

mar ke bhī ḳhatm silsila na huā

dām-e-ulfat meñ jo phañsā 'nāshād'

ho ke āzād bhī rihā na huā

dil jo shaista-e-jafa na hua

lazzat-e-gham se aashna na hua

tu kabhi pas se juda na hua

dil magar surat-ashna na hua

zindagi ka maza wo kya jaane

jis ko marne ka hausla na hua

hum ko shikwa raha judai ka

aur tu pas se juda na hua

tum se kahne se faeda koi

KHair jo kuchh hua bura na hua

sochte hi rahe kahin na kahin

na hua arz-e-muddaa na hua

yaad karte hain husn-o-ishq hamein

mar ke bhi KHatm silsila na hua

dam-e-ulfat mein jo phansa 'nashad'

ho ke aazad bhi riha na hua